Мэдээллийн технологи сонирхдог зарим хуульч, судлаач нар бүр хуулийн фирмийн оршин тогтнол ирээдүйд технологиос хамаардаг болох вий хэмээн сэжиглэж байна. Ямартай ч энэхүү мэдээллээр бид хэрэв танай хуулийн фирм мэдээллийн технологид ач холбогдол өгч, түүнийг ашиглаж чадвал ямар 3 давуу талыг бий болгож болох вэ талаар хүргэхийг зорьлоо.
"Хөдөлмөрийн бүтээмж өснө"
Тэгэлгүй яахав, хуулийн практикт өгөх технологийн давуу тал нь таны хөдөлмөрийн бүтээмжид сайнаар нөлөөлөх үр ашигтай байдал юм. Өөрөөр хэлбэл, урт хугацаа зарцуулах байсан ажлын цагийн хугацааг технологийн тусламжтайгаар багасгана гэсэн үг. Тэгэхээр үр дүнд нь та илүү гарсан сул, чөлөөт цагаа хэрхэн ашиглах вэ гэдэг л асуудал үлдэж байна, түүнийг хэрхэн ашиглаж болох вэ?Сайн хуульч байхын нэг шинж тэмдэг нь хуулийн фирмийн захиргааны өдөр тутмын ажилд анхаарал хандуулах болон үйлчлүүлэгч нартаа хангалттай цаг гаргаж, тэдэнтэй бат бөх харилцаа тогтоох явдал байдаг. Ер нь харилцаанаас үүдэлтэй алдаа, зөрчил, гомдлын талаар мэдээлэл АНУ-ын Баарын холбоонд хамгийн их ирдэг судалгааны мэдээлэл байна.
Бас та өөртөө бодох цаг гаргаж, үйл ажиллагааны цаашид авч хэрэгжүүлэх төлөвлөгөө боловсруулж болж байна. Та оффисын өдөр тутмын ажилд дарагдсанаар фирмийн үйл ажиллагаанд шинийг сэдэж, боловсруулах, мэргэжил нэгт хүмүүстэй networking хийхэд цаг зав гаргах боломжгүй болж ирдэг. Мэдээллийн технологийн тусламжтайгаар та өөртөө чөлөөт цагийг бий болгосноор хуулийн фирмийн өсөлтөд эерэг нөлөө үзүүлээд зогсохгүй, таны үйлчлүүлэгч нартаа үзүүлэх үйлчилгээний чанарт ч эерэгээр нөлөөлөх болно.
"Алдаа гаргах магадлалыг бууруулна"
Хуульч, өмгөөлөгчийн хувьд энэ нь танд таатай сонсогдож байгаа байх. Таны хийдэг ажлын тэн хагас нь үйлчлүүлэгч нарт хэрхэх талаар зөвлөх явдал байдаг ч энэхүү үйл ажиллагааны явцад гарч болох зарим алдаа, дутагдлыг багасгахад мөн адил анхаарал хандуулах хэрэгтэй. АНУ-ын Баарын холбооны судалгаанаас харахад, 2010 онд хуульчдын гаргасан мэргэжлийн нийт алдааны 45% нь аливаа товлогдсон хугацааг хэтрүүлсэн, мэдээлэл буруу бүртгэж авсан, компьютер дахь файлуудаа алдсан, удаашралтай ажилласан, ашиг сонирхолын зэрэг зөрчил байна. Ажил ихтэй, завгүй өдөр хэн ч байсан ийм алдааг гаргаж болох. Гэтэл хуульч нар технологийн шийдлийн тусламжтайгаар дээрх алдаануудаас урьдчилан сэргийлэх боломжтой шүү дээ.Технологи яаж туслах вэ гэж үү? Үүлэн технологид суурилсан практик менежментийн програм хангамж гэж бий. Үүгээр та уулзалтын тов төлөвлөх; үйлчлүүлэгчтэй холбогдох харилцаа, мэдээлэл; үйлчилгээний төлбөр тооцоо; нягтлан бодох бүртгэл; компьютерийн файлууд болон баримт бичгийг manage хийх, боловсруулах үйл ажиллагааг хялбарчилж, тэдгээрийг бүхлээр нь удирдах юм.
Товчхондоо, хуулийн фирмийн үйл ажиллагааг бартаа саадгүй явуулахад тустай мэдээллийн технологийн нэгэн ололт хэмээн ойлгож болно. Үр дүнд нь танай фирмийн үйл ажиллагааны процесс сайжирч, эрсдэл буурах юм.
"Үйлчлүүлэгчтэй сайн харилцаа тогтоох"
Орчин цагт та амжилттай бизнес эрхлэхийг хүсвэл үйлчлүүлэгчтэй тогтоох харилцаа холбоо буюу customer experience гэдэг зүйлд анхаарал хандуулах хэрэгтэй. Магадгүй хуульч нар хуучин цагт үүнд нээх ач холбогдол өгдөггүй байсан. Учир нь тухайн үеийн зах зээл харьцангуй цөөн тоглогчтой байх ба хуулийн фирмийн давамгайлах байр суурь болон хууль зүйн хязгаарлагдмал тооны үйлчилгээ нь тэдэнд давуу тал олгодог байв. Мөн эрэлт үргэлж нийлүүлэлтээсээ давдаг байснаас үүдэн үйлчлүүлэгч нарт үйлчилгээний төлбөр үнэтэй тусдаг байв.Гэвч энэ байдал одоо өөрчлөгдөж эхэлсэн байна. Олон нийт буюу иргэд “Интернэт”-ийн тусламжтайгаар, олон эх сурвалжаас хууль зүйн төлбөртэй, төлбөргүй заавар, зөвлөгөө, тусламж авах шийдэл бий болов. Хиймэл оюун ухаан, автоматжуулалт гэдэг зүйлс өдөр ирэх тутам хөгжиж, бүр хууль зүйн салбарт орж ирснээр хуульч, хуульчийн туслахын байр суурь, ач холбогдол багасаж эхлэх талруугаа хандаж байна. Ийм хүнд хэцүү цаг үе гэх үү, өрсөлдөөнтэй зах зээлийн нөхцөлд амжилт гаргая гэвэл та үйлчлүүлэгчтэй тогтоох харилцаа, холбоондоо онцгой ач холбогдол өгөх нь зүйтэй юм.
Технологийн тусламжтайгаар та хууль зүйн үйлчилгээг хялбар аргаар үйлчлүүлэгчид хүргэж, худалдах боломжтой. Өнөөдөр үйлчлүүлэгч нар аливаа үйлчилгээг аль болох хялбар арга замаар хүлээж авахыг хүсдэг болсон. Тэд баримт бичиг хэвлэх, хувилах, тэднийг гараар бичиж бөглөх, бараг гарын үсэг зурахыг ч хүсэхгүй. Оронд нь айФон утаснаасаа дижитал форм бөглөх, тоон гарын үсгээр баталгаажуулах, зайнаас харилцах, үйлчилгээний төлбөрөө интернэтээр шилжүүлэхийг хүснэ. Энэ бүхний шийдэл нь технологийн тусламжтайгаар аль хэдийн боловсруулагдсан болно. Өмнө дурдсан практик/кэйс менежментийн програм хангамжийн тусламжтай та эдгээр үйлдлүүдийг гүйцэтгэх боломжтой юм.
Дүгнэлт
20-р зууны сүүл, 21-р зууны эхэн үеэс өссөн технологийн эрчимтэй хөгжил олон салбарт хувьсал өрнүүлж, зарим олон ч салбарыг дампууруулсан. Аядуу, зөөлөн хэмнэлээр мэдээллийн технологитой интеграци хийх буюу нэгдэж буй онцлогтой Хууль зүйн салбарт ч өөрчлөлт явагдаад эхэлсэн. Ойрын ирээдүйд өөрчлөлт бүр ихээр явагдах нь тодорхой ч түүнээс цаашхи ирээдүй хуульч нарын хувьд ямар байхыг хэн ч хэлж мэдэхгүй байна. Өнөөдрийн нөхцөлд, таныг бусад хуульчдаас онцгой болоход туслах технологийн дээрх 3 давуу тал танд хүлээж байснаас тань илүү хэмжээнд үр ашгаа өгөх болно гэдэгт харин бид итгэлтэй байна.Эх сурвалж: Lexicata
Орчуулсан: FMB
Comments