Биднийг хүүхэд, сурагч, оюутан байхад хэн ч их унтлаа, босооч хэмээн барагтаа л хэлж байгаагүй билээ. Хэрвээ хичээлээ тасалсан, хичээл дээрээ муу үнэлгээ авсан биш л бол шүү дээ. Харин ажил дээр гараад, бие даагаад ирэхээр хүнд цагийн менежмент, зохион байгуулалттай байх, төлөвлөгөөтэй байх гэдэг зүйлс яагаад ч юм хэрэг болдог юм байна. Үүнийг би өөр дээрээ голцуу тулгуурлаж бичиж байгаа учраас дээрх зүйлс нь оюутан, сурагчдад хамааралгүй юм гэж байгаа юм биш шүү. Жишээ нь зарим хүмүүсийн амьдрал нэгэн хэвийн циклд орчихсон, гоц сонирхолтой зүйл ер байхгүй, үргэлжлээд л байдаг болчихдог. Минийх ч гэсэн тийм байсан бөгөөд байгаа. Өглөө ажилдаа гарлаа, өдөржин тэнд байлаа, орой гэртээ ирлээ, хоолоо хийлээ, зурагт жаахан харлаа, унтахаасаа өмнө ном уншвал уншина үгүй бол интернэт орно, ерөнхийдөө нэг ийм. Маргааш нь нойрмог амьтан босоод л дуртай дургүй гэрээсээ гарна гэх мэтчилэн. Магадгүй тухайн өдөр их хурдан болоод өнгөрчихсөн бөгөөд өөр зүйл хийх гэхээр маргааш ажилтай учир эртхэн унтаж амрахгүй бол болохгүй гэдэг ч юм уу. Гэтэл үүнийг хэрхэн өөрчилж, олон цаг гаргаж болох тухай, хэрхэн эрч хүчтэй байх талаар зохиогч номондоо баримт, жишээгээр баталгаажуулан эмхтгэж оруулжээ. Сайшо Хироши нь өөрөө аавынхаа мэргэжлийг өвлөж авсан доктор бөгөөд сэтгэл судлаач мэргэжилтэй хүн юм билээ. Энэ хүний тухай дэлгэрэнгүй мэдээлэл харамсалтай нь би интернэтээс олж авч чадсангүй. Япон хэл дээр л олдвол олдох юм шиг санагдсан.
Номыг унших явцад нээрэн тийм шүү, яасан үнэн юм бэ гэх мэт хүлээн зөвшөөрсөн олон зүйл тааралдаж байсан. Ямартай ч хэрэв та уншаагүй байгаа бол заавал олж уншаарай хэмээн зөвлөж байна. Яг л Дэйл Карнегийн харилцааны тухай ном уншиж байгаа мэт санагдаж байлаа.
Нэг видео бичлэгээс үзсэн юм. Хүнийг 3 ангилдаг гэнэ. Нэгдүгээрт, өглөө эрт сэрдэг, эрч хүчтэй, зорилготой гэдэг нь харваас илт хүмүүс. Хоёрдугаарт, унтах дуртай, нойроо бусдаас харамладаг, ихэвчлэн шөнийн шар шувуунууд, мөн нэгдүгээр ангиллын хүмүүсийг жаахан юмтай гэж боддог. Гуравдугаарт, өглөө эрт босохыг хүссэн ч чаддаггүй, өөрсдийн амьдралын хэмнэлийг өөрчлөхийг хүссэн хүмүүс байдаг гэнэ. Тэгэхээр та бид нар 3-р ангилалд багтаж байна.
Сураагүй хүмүүсийн хувьд ажил, хичээлтэй биш л бол өглөө эрт босно гэдэг нь байж болшгүй утгагүй зүйл. Тэд хэлэхдээ, “бид унтаж амарч байх хэрэгтэй” гэдэг үндэслэлээр үүнийгээ зөвтгөдөг. Та анзаарч байсан бол бүхий л амжилттай, дэлхийн хэмжээний хүмүүс өглөө эрт босдог байна. Энэ тухай мэдээллийг та хаанаас ч олж болно. Зарим хүмүүс жишээ нь өдөрт 3-4 цаг унтдаг байхад, ихэнх нь дунджаар 5-6 цаг байдаг байна. Бурхан минь, хүн амьдралынхаа 3/1-ийг унтаж өнгөрөөдөг гэдэг бол эдгээр хүмүүс 4/1-ийг байх нь байна шүү дээ. Өөрөөр хэлбэл, бусдаас илүү ажиллаж, суралцах, хөгжилдөх цаг бий болгоод байна л даа, үүнд нь амжилтын нэгээхэн хэсэг нь багтаж байгаа болов уу.
Магадгүй зарим хүмүүст өмнө нь дурдаж байсанчлан ямар тэнэг юм бэ гэж санагдаж магад. Бодит байдал ийм л байна. Хүн яг ийм циклээр эрүүл саруул, урт удаан, аз жаргалтай амьдарч болдог талаарх нууц жорыг чухам энэхүү номонд зааж өгчээ. Харин яаж гэдгийг дотор агуулгаас нь дэлгэрэнгүй олж уншаарай.
Одоо та бүхэнд өглөөний хүн болон шөнийн шар шувуу хоорондын ялгааг харуулсан хөгжилтэй бичлэг буюу киноны хэсгээс хүргэе.
(Энэ унтаж байгаа нөхөр бол ажилгүй, сургуулиасаа хөөгдсөн нэгэн, гэхдээ толгой сайтай. Харин өглөөний нарыг нэгэн бүсгүйтээ хамт угтаж байгаа нөхөр бол Нью Йоркийн томоохон хуулийн фирмийн партнер, хуульч жентельмэн бөгөөд тэрээр өнгөрсөн шөнө хамт хоносон бүсгүйд хэлэхдээ “Би ажлаасаа хоцрохыг хүсдэггүй юм, 7:30 цаг гэхэд ажлынхаа өрөөнд байж байх ёстой. За яахав, чамайг хүсвэл өнөөдөр жимд явахаа болиод 9:00 хүртэл цуг байж болох юм” хэмээж байна.)
Нэгэнт би өглөө босохын ач тусыг энэхүү номон дээр байгаагаас илүү тайлбарлаж хүчрэхгүй учраас уншаагүй хүмүүст энэхүү номын гайхалтай сайхан талыг уншиж мэдрээрэй гэж хэлэх байна.
Comments