Уйтгартай лекцээс амь гарах нь

Лекц гэлтгүй ангид семинар орох үед ч бүр хичээлийн эхний цаг байсан ч гэлээ нойр хүрэх, багшийн яриад байгаа зүйлийг сонсохгүй байх, шал өөр зүйл бодогдох, хэвтмээр санагдах, юм идмээр санагдах гээд тоолж баршгүй олон шалтгаан оюутнуудад хааяа тохиолдох нь бий. Энэ нь амьдралын буруу хэвшилтэй холбоотой байж болох ч үдээс хойш орох урт лекцийн тухайд аваад үзвэл өөрийн эрхгүй л залхуутай байдал ажиглагддаг. Тэгэхээр энэ бүгдэд бэлтгэлтэй, өмнөхөөсөө сэргэлэн байхад дараах хэдхэн зөвлөгөөг мэдээд авчихад илүүдэхгүй юм.

АЛИВААД ШУДАРГА ХАНД

Ухаандаа хичээлдээ. Учир нь та өглөө эхний цаг хичээлтэй гэдгээ мэдсэн л бол өмнөх орой нь эртхэн унтаж амар, гол нь эрт бос. Эрт босно гэдэг маань танд үс, шүд, нүүр, гараа угаахад, өглөөний цайгаа тайван уух, хувцсаа индүүдэх, тайван өмсөх, хичээлээ ялгах гэх мэт зүйлүүдэд хангалттай цаг авч өгөх ба ингэснээр та нэг ёсны бэлтгэлтэй хичээлдээ очиж байна гэсэн үг. Эсрэгээр нь аваад үзье, та шөнөжин суусан, хичээлээ хийсэн ч бай зурагт үзсэн ч бай эцсийн эцэст нойр хүрээд унтахад та өглөө хичээл эхлэхээс 1 цагийн өмнө сэрэх нь бий. Энэ хугацаанд та миний дээр дурдсан биеэ арчлах тал дээр хам хум, автобусанд чихэлдээн, түгжрээнд суусаар гүйн гүйн ангидаа нэг хачин амьтан орох нь ойлгомжтой. Тийм хүний тухайн өдөр тэр чигтээ нэг л унтаа, урагшгүй болоод өнгөрдөг болохыг бид мэднэ. Мөн доор дурдсан асуудлууд гарч ирдэг.

ӨГЛӨӨНИЙ ЦАЙГАА ЗААВАЛ УУ

Орой сэрсэн амьтан цайгаа уулгүй гарахад өглөөний лекцэн дээр юу болно гэж бодож байна? Өөрийн эрхгүй гэдэс өлсөнө, энэ чинь өөрт тань мэдрэгдэнэ. Тиймээс та лекц орж байх чимээ аниргүй үед битгий л олны дунд гэдэс минь дугарчихаасай хэмээн бодно. Хүсэхээр хясна гэгчээр энэ тухай бодсон л бол гэдэс дугарч, дотор эвгүйрхэн юун лекцэд анхаарал хандуулах манатай, хурдхан завсарлаасай гэсэн бодол толгойд тань эргэлдсээр үд хүргэнэ.

ХҮРЭЭЛЛЭЭ ЗӨВ СОНГО

Лекцэн дээр хэнтэй суух нь цаашдын тань идэвхтэй идэвхгүй байдалд нөлөөлнө. Таны найзууд ямар ч байж болно. Тэд хичээл сонирхолгүй бол утсаараа тоглоно, өөр юм ярьна, бүр унтана тэр тохиолдолд та тэднийг ийн дагасаар нэг л мэдэхэд унтаад өгнө, ядахдаа л багшийн хичээлийг ойлгохгүйд хүрэх юм. Магадгүй нөгөө ангийнхаа нэг гавалын хажууд суучихвал түүнийг дагаад хичээлд идэвхтэй оролцож болох. Яг л харж явдаг охиндоо таалагдах гэж хичээлдээ сайн амьтан болдогтой адил зүйл.

Тэмдэглэлийн тухайд түүнийг өөрт тааламжтай, сонирхолтой аргаар хөтөлж болно. Жишээ нь олон өнгө хослуулах, өөрийн дураар системчлэх гэх мэт энэ нь таны сурах, бичих сэдлийг төрүүлж өгдөг.

За өөр энд дурдаагүй олон аргууд байгаа байхаа. Зөв суух, анхаарлаа хандуулах чадвартай болсон байх, анги чимээ шуугиангүй байх, сэргэг байх, ар гэрийн асуудалгүй байх, бие эрүүл байх гэх мэт.