Би машингүй ч гэлээ түүнд заавал даатгуулах уу?

Та энд яг ямар даатгалын талаар бичих гэж байгааг сайн мэдэж байгаа. Тэгэлгүй яахав, энэ бол хүмүүсийн хэлж заншсанаар Хариуцлагын даатгал буюу Жолоочийн хариуцлагын албан журмын даатгал юм.

Зарим хүмүүс ихэд эргэлздэг. Бодохдоо, “Жолоочийн даатгалын тухай гэхээр жолооч бүр энэ даатгалд нь хамрагдах ёстой юу? За байз, жолооч гэдэг чинь юу билээ…” гээд л Замын хөдөлгөөний дүрэм сөхөх шаардлага гарна. Гэхдээ танд гэж хэлэхэд жолооч бүр даатгуулах албагүй юм.

Жолооны үнэмлэхтэй боловч өөрийн эзэмшлийн машин, тээврийн хэрэгсэлгүй улсууд олон байдаг шүү дээ. Тэгэхээр тэр хүмүүс заавал даатгалд хамрагдах үүрэг хүлээхгүй бөгөөд гагцхүү тээврийн хэрэгслийн өмчлөгч бүр жолоочийн даатгалд заавал хамрагдах учиртай хэмээн “Жолоочийн даатгалын тухай” хуульд заасан байна.

Жишээ нь би өөрийн нэр дээр хэн нэгэн хувь хүн, автомашин борлуулагчаас машин худалдаж авлаа гэхэд тухайн өдөр, ойр байрлах аль нэг даатгалын компанид хандаж, Жолоочийн даатгалаа хийлгэнэ. B ангилалын машины суурь хураамж 33 мянган төгрөг байна. Гэхдээ эцсийн хураамжийг тооцохдоо “Итгэлцүүр” гэх зүйлийг ашиглах ба энэ нь таны жолооны туршлага, тээврийн хэрэгслийн нийт 9 мэдээлэл дээр үндэслэн бодогдож, гарна. Өөрөөр хэлбэл 33 мянган төгрөгнөөс дээш эсвэл доошоо хэлбэлзэнэ гэсэн үг юм. Жолооч бүрийн Жолоочийн даатгалын хураамж харилцан адилгүй байна гэсэн үг. Даатгалын компаниудаас үзүүлэх энэ төрлийн даатгалын хураамж, НТ-ийн хэмжээ ялгаагүй адилхан байх бөгөөд үүнд нээг их ач холбогдол өгөх хэрэггүй болов уу. Ингэсний дараагаар танд тээврийн хэрэгслийн улсын үзлэг оношлогоонд хамрагдах, тээврийн хэрэгслийн гэрчилгээ, улсын дугаар авах, замын хөдөлгөөнд оролцох бүрэн боломж бий болно гэж ойлгож болно.

Харин машингүй жолооч хэн нэгний тээврийн хэрэгслийг барих болбол тэрээр тухайн тээврийн хэрэгсэл өмчлөгчийн Жолоочийн даатгалын гэрээнд нэрээ урьдчилан бичүүлж, мэдээллийн санд бүргүүлсэн байх хэрэгтэй байдаг. Учир нь тус даатгалын нэг зарчим нь “Жолоочийн даатгалд даатгуулаагүй жолоочийг замын хөдөлгөөнд оролцуулахүй байх” юм.

Харин зам тээврийн хөдөлгөөнд оролцохдоо даатгалгүй байх, эсвэл даатгуулагчийн гэрээн дээр нэр тань бичигдээгүй байх тохиолдолд эрх бүхий албан тушаалтан таныг (Замын цагдаа?) 192 мянган төгрөгөөр торгож, даатгал хийлгэх өдөр хүртэлх хугацаанд тээврийн хэрэгслийг тань журмын хашааруу зөөн шилжүүлж 60 мянган төгрөг, хоног бүрт 5000 төгрөгөөр тооцож, хуулийн хариуцлага хүлээлгэхээр Жолоочийн даатгалын тухай хуульд заажээ.