Амжилттай хуулийн оюутан байхын нэг гол шинж нь цагийг үр бүтээлтэй ашиглаж чаддаг байх чадвар юм. Энэ нь зөвхөн бүх зүйлийг амжуулахын нэр биш бөгөөд чамд тохиох элдэв стресс, бухимдал, төлөвлөгдөөгүй гэнэтийн зүйлс зэрэгт хандах давчуу байдлыг багасгаад зогсохгүй, хичээлдээ төвлөрч суралцахад ч ашигтай зүйл гэдгийг ойлгоорой.
Өдрийн эсвэл орой ангийн оюутан аль нь ч бай, сургууль дээр очиж, байх цагийг урьдчилан төлөвлөх нь зүйтэй. Тэгэхээр тухайн өдрийнхөө төлөвлөгөөг зохио. Тэрхүү төлөвлөгөө тань цаг цагаар, өдөр өдрөөр, сар сараар, цаашилбал улирлаар бичигдсэн байж болно. Зарим оюутнууд үүнийг хийхдээ гар утас, таблет, компьютер дээр ашиглахад зориулсан програм хэрэглэдэг. Харин зарим нь уламжлалт календарь, хатуу хавтастай тэмдэглэлийн дэвтэр зэргийг ашигладаг.
Тэгэхээр өөрийн төлөвлөгөөг зохиож, боловсруулах гэж буй танд хэрэгтэй байж болох зарим зүйлсийг доор жагсааж байна.
Тухайн өдөр хийх гэж буй бүх зүйлд урьдчилан цаг гаргаж төлөвлө. Хичээл, төлөвлөгөөт ажил, хуулийн сургуулиас гадуур хийх бусад ажлууд гээд. Мөн тэдгээр ажлуудын хооронд зарцуулагдах алхах, тээврийн хэрэгслээр зорчих, гэртээ харих гэх мэт цагуудыг энэхүү төлөвлөгөөндөө багтааж байхыг мартаж болохгүй.
Хичээл нэг бүрт тусгайлан цаг гаргах. Амжилттай хуулийн оюутан байхын тулд хичээлээ давтах цаг гаргаж байхгүй бол болохгүй. Жишээ нь даваа гарагт Иргэний эрх зүйн 1 цаг 30 минутын хичээлтэй байлаа гэхэд түүнд зориулж багадаа 3 цаг 30 минут буюу хичээлээс гадуур илүү 2 цагийг тухайн хичээлийн сэдвийг дэлгэрүүлж судлах, авсан ойлголтоо баталгаажуулахад төлөвлөх хэрэгтэй. Шинэ оюутан бол магадгүй үүнээс илүү цагийг ч зарцуулж болзошгүй. Төгсөх курсийн оюутнуудад аливаа хичээл дээр багшаас даалгасан ажил, даалгаварыг гүйцэтгэхэд бага хугацаа өгөгддөг. Хэрэв та хичээл бүрт энэ мэт хангалттай цагийг төлөвлөж байхгүй бол улирлын эцэст баларч, давтан уншиж, шалгалтанд бэлтгэхэд нэгэнт оройтсон байх болно.
Суралцах төлөвлөгөө зохиохдоо энэ асуултыг өөртөө тавиарай, “Миний тархи хэзээ, ямар үед сэргэг байдаг билээ? Өглөөд аливааг хийхэд таатай байдаг уу эсвэл үдээс хойш жимд /gym/ явсны дараа олон хуудас ном тогтож уншихад дөхөм байдаг билүү” гэж. Төлөвлөгөөнд байх чухал зүйлсээ өөрт хамгийн тохиромжтой цаг үед тааруулан төлөвлөөрэй.
Төлөвлөгөөний жагсаалтыг зөвхөн хичээл номонд зориулах бус, өөртөө болон өрөөлд анхаарал тавих зүйлсээр баяжуулаарай. Хооллох, дасгал хөдөлгөөн хийх, амрах, зугаалах гэх мэт. Ингэж чадвал та үргэлж сэргэг байж, суралцахдаа нойрмог бус цовоо байж чадна.
Та төлөвлөгөөгөө тогтмол хөтөлж, түүний гүйцэтгэлийг үргэлж шалгаж байгаарай. Нэг чухал ажилд нөгөө чухал ажлаас бага эсвэл хэтэрхий их цаг төлөвлөж, зарцуулахаас сэргийлээрэй. Ер нь төлөвлөгөөг үргэлж шалгаж, сайтар бодож боловсруулж байх нь аливаад зарцуулах цаг хугацааны үр ашигтай байдалд тань эерэгээр нөлөөлж байх болно.
Эх сурвалж: Lawschoolacademicsuccess.com
#FutureLegalLegends
Comments