НЭР ХҮНД
Хуульч бол өнөөгийн нийгэмд гэхээсээ илүү ер нь хүний бүхий л нийгэмд нэр хүндтэй мэргэжил байсаар ирсэн. Гэхдээ нэр хүндийг зүгээр ч нэг авдаггүй юм гэдгийг санаж явах хэрэгтэй. Өөрөөр хэлбэл таны хэлсэн үг бүрийг үнэн мэтээр ойлгодог болох хүртлээ чамгүй урт замыг туулахаас гадна наана нь зөндөө үл итгэгч хуулийг үл хүндлэгчидтэй таарах болно. Хэрэв та энэ бүхнийг шантрахгүй давж чадна гэвэл та хуульч болсноос хойш дор 10 – 30, за магадгүй 20 – 50 жилийн дараа хангалттай нэр хүндтэй болж магадгүй. Гэхдээ үгүй ч байж мэднэ. Ингэж хэлэхийн учир нь мянгад нэг эсвэл хоёр хүн л магадгүй арван мянгад нэг хоёр хүн л ийм нэр хүндтэй болдог.ОРЛОГО
Америкт хуульчид ямархуу орлоготой байдгийг сонсож л байсан биз. Эсвэл кинон дээрээс харж байсан байх. Монголд тиймэрхүү дайны орлоготой байна гэдэг үлгэр мэт боловч ойрын хэдэн жилдээ монголын санхүү томроод ирэхийн цагт болох боломжтой байж болох юм. Гэхдээ одоо ч гэсэн энэ байгаа жижигхэн санхүүдээ хангалттай орлого олдог хуульчид байдаг. Гэхдээ ийм орлоготой болохын тулд хангалттай нэр хүндтэй, хангалттай ур чадвартай байх ёстой. Бусдаас хангалттай ялгарч чаддаг байх ёстой. (Энэ талаар хойно өгүүлнэ.)КАЙФ
Хэрвээ өөрийнхөө дуртай зүйлийг тодорхойлж юунаас кайф авдагаа мэдэж байгаа бол Хуульч хүн юунаас кайф авдагийг нэг сонсоод үз. Магадгүй таныхтай тохирох ч юм билүү. Тэгвэл та хуульч мэргэжлийг сонгоход сайхан кайфтай ажиллана гэсэн үг. Миний хувьд судлаач гэж явдаг. Өөрөөр хэлбэл, аливаа хуулийн сул талыг харж нийгэмд буй хүндрэл бэрхшээлийг хэрхэн яаж хуульчилж шийдвэрлэх, эсвэл одоо байгаа хууль нь нийгэмд ямар хүндрэл бэрхшээл авчирч байгаа, батлах гэж байгаа хууль нь ямар бэрхшээлийг авчирч болох эсэхийг судлах ажил хийдэг. Энэ нь хүмүүсийн амьдралыг судлах, хүмүүс тодорхой шийдвэрүүдэд үзүүлдэг реакц гэх мэтийг судлах гээд л олон шаттай. Ингэж судлахаар ямар нэг юмны алдааг олж байгаа мэт санагдана. Ирээдүйг чадлаараа төсөөлж байгаа мэт санагддаг тул ихээхэн кайфтай байдаг билээ. За тэгээд хуулийн зөвлөх, өмгөөлөгч хийх үед бас л хүмүүсийн алдааг засахыг хичээдэг тул өөрөө алдаа гаргахгүйн тулд яах вэ, ямар нэгэн гэрээ хэлцэл байгуулахад зөвлөгөө өгөх гэж байгаа бол тухайн гэрээний хувьд ирээдүйд ямар маргаан гарч болох вэ гэдгийг бүгдийг тооцоолох ёстой болдог зэрэг нь асар тооцоо судалгаатай хүмүүсийн дотор нь орсон мэт гүнзгий сэтгэж, үргэлж бусдыг давж харах шаардлага бий болгодог тул ухаан сорьсон тоглоом тоглох мэт санагдана. Хэрвээ алдвал хүний амь амьдрал, мөнгө төгрөг гэх зүйлсийг сүйтгэх аюултай тул маш болгоомжтой л тоглох хэрэгтэй. За тэгээд бусдад туслах, ядарч зүдэрсэн нэгэнд зөвлөгөө өгөх мэт нь зүйрлэшгүй сайхан мэдрэмжийг өгдөг. Одоо хамгийн гоё нь. Хэхэ, энэ бол өөрийгөө шийдвэр гаргагч мэт бодох. Хэрэв та шүүгч болбол хүнийг шоронд хийх эсэхийг, хэрэв та зөвлөх бол даргад үүнийг хий, тэрийг хий гэж зөвлөх мэтээр эцсийн шийдвэрт нөлөөлөх чадвартай тул асар их эрх мэдэл, эрх мэдэл гэдэг үргэлж хүмүүн бидний шунан дурладаг зүйл билээ.СОНГОХГҮЙ БАЙХ ШАЛТГААНУУД
1. Мэдээж ажлын байрны нөөц гэдэг зүйлийг эхэнд дурдах нь зүйтэй болов уу. Одоогийн байдлаар бол Монгол улс хуульчдаар хахчихаад байгаа. Жилд ойролцоогоор 2000-3000 хуульч бэлтгэн гаргаж байна. Гэтэл хоёрхон сая хүнтэй улсад үсрээд л 6000 хуульчийн орон тоо байж болох. За яахав, бүх гэр бүлийг хуульчтай байлгах гээд өөдрөгөөр төсөөлбөл 10000 хуульч. Гэтэл зах зээлд нийлүүлэгдсэн хуульч мэргэжилтэй хүний тоо аль хэдийн энэ тооноос давчихсан юм. Хэрвээ та хуульч болоё гэж бат шийдсэн бол төгсөөд ажилгүй хэдэн сар алхах магадгүй хэдэн жил эсвэл хэзээ ч мэргэжилээрээ ажиллахгүй байж магадгүй гэж бодох хэрэгтэй. Мэдээж жил болгон төгсгөгчдөөс онц сайн ялгарч бусдаас гоцорч чадсан цөөхөн нэгний нэг байж чадна гэж бодож байвал өөр хэрэг.2. Ур чадвар. Ур чадварын хувьд жирийн л нэг биш төгс гоц гойд байж л та амжилтанд хүрэх болно. Жил бүр төгссөн мянга мянган төгсөгч дээр нэмэх нь өмнө нь төгссөн одоо мэргэжлээрээ ажиллаж байгаа үй түмэн хүмүүсээс ялгарч байж амжилтанд хүрнэ гэдэг асар хэцүү. Жирийн нэг ур чадвар биш асар өндөр ур чадвар шаардлагатай тул хэрвээ та өөрийгөө зөвөөр үнэлдэг бол хэзээ ч энэ мэргэжлийг сонгохгүй байх нь зөв юм.
Гэрэл гэгээтэй ирээдүйн амьдралд чинь амжилт хүсэж, цаашид амьдрах хоолоо олж идэх хэрэгслээ зөв сонгоход тань өчүүхэн төдий ч атугай нэмэр болж чадвал миний хувьд туйлаас таатай байх тул асуусан асуулт болгонд чинь хариулахыг хичээх болноо.
Бичвэрийг Пират, Асуулт форумын гишүүн
Comments