Олон улсын чанартай мэдээг телевизээр үзэх үеэр “ийм, тийм хүний шүүх хурал боллоо” хэмээн голдуу Америк дахь үйл явдал гардаг. Энэ тохиолдолд дэлгэцээр гар зурмал үзүүлэх ба тэр нь тухайн шүүх хуралдаанд оролцогсод болон мэдүүлэг өгч байгаа шүүгдэгчийн дүрс, товчхондоо хурлын процедурыг илтгэсэн байдаг. Тэгэхээр яагаад ийнхүү гар зурмал үзүүлдэг талаар бяцхан мэдээлэл.
Угтаа бол маш энгийн. Америкийн олонхи мужийн шүүх хуулиараа хэвлэл мэдээллийнхэн болоод фото зураг, дүрс бичлэг, дуу хураагуур бүхий хэрэгсэлтэй хүнийг иргэдийн төлөөлөгч байлаа ч гэсэн шүүх хурлын танхимруу оруулдаггүй байна. Мэдээж хэрэг олон шалтгаантай. Мэдүүлэг өгөгч этгээдийн анхаарлыг сарниулна, өөрийгөө чөлөөтэй илэрхийлэх боломж тодорхой хэмжээгээр хумигдана, хувь хүн байгууллагын нууцтай холбоотой зүйл яригдана, гэрч хамгаалах асуудал г.м. Манайд харьцангуй чөлөөтэй хуульчилсан нь шүүх хуралдааныг хуульд тусгайлан зааснаас бусад тохиолдолд нээлттэй явуулах тухай заасан байдаг билээ.
Иргэдийн төлөөлөлд энэхүү зургийг зурах мэргэжлийн зурагчин багтах бөгөөд тэрээр 1 зургийг ихэвчлэн 10 минутанд зурж, эцэст нь шүүхийн архивт хадгалуулдаг, мөн гарч ирээд хэвлэлийнхэнд зарж болдог байх юм. Америкт ийм байхад зарим орнуудад буюу жишээ нь Британи, Хонгконгод бүр хаалттай буюу гар зурмал зөвшөөрөгддөггүй байна. Тиймээс ч зурагчид дотор нь орж сууж байгаад гарч ирээд зургаа зурдаг гэнэ.
Comments