Хуульч болно гэдэг тийм ч амар зүйл биш билээ, магадгүй чи чадна гэж бодож байгаа бол чиний амьдралыг өөрчлөх нь гарцаагүй юм. Учир нь хуульч хүнд байх наад захын шаардлага бол юун түрүүнд өөрийгөө илэрхийлэх чадвартай байх байдаг. Түүн дотроо хэл яриагаараа, бичгээр, үйлдлээр гэх мэт. Дараа нь унших чадвар. Ерөөс хуулийн сургуульд орсон л бол онолын их хэмжээний ном, гарын авлага, эрдмийн ажил зэрэг унших зүйлүүдэд дарагддаг нь гарцаагүй үнэн зүйл. Маш их хэмжээний зүйл уншина, ойлгоно, цээжлэнэ. Мөн бичиг баримт боловсруулах чадвар. Энэ нь ирээдүйд хуулийн төсөл боловсруулах, гэрээ боловсруулах, илтгэл, эсээ бичих зэрэгт илэрдэг зүйл. Сэтгэн бодох чадвар. Ялангуяа хичээлийн үеэр бодлого буюу тодорхой болсон үйл явдал дээр тулгуурлан логик гаргалгааг бодож олсны үндсэн дээр зохих хууль, дүрэм журмыг зөв ашиглах чадвараар нэгэн зэрэг илэрнэ гэх мэт. Гадаад хэл. Наад зах нь өөрийн мэргэжлийн Англи хэлтэй байх хэрэгтэй гэсэн шаардлага сүүлийн үеийн ажлын заруудад энгийн үзэгдэл байх болжээ. Цаашлаад 2+ тооны хэлийг бүрэн эзэмшсэн байх хэрэгтэй ч гэдэг. Сүүлд нь, компьютерийн хэрэглээний програм, оффисын тоног төхөөрөмжтэй харьцах чадвартай байх явдал юм.
Дээрхээс аль нэг мэдлэг чадвар, ур зүй чамд одоо дутагдаж байгаа бол санаа зовох хэрэггүй ээ. 4 эсвэл 5 жил хуулийн сургуульд суралцах явцад хэрэв чи зорилгоосоо буцаж, шантрахгүй л бол дээрх бүгдийг нэг мэдэхэд л зохих хэмжээнд нь эзэмшчихсэн байх нь гарцаагүй.
Тэгэхээр дунд сургуулиа төгсөөд их, дээд сургуульд суралцах гээд мэргэжлээ сонгох гэж буй чамд зөвлөхөд хүн зөвхөн өөрийнхөө хүслийг л дагах нь зүйтэй байдаг юм. Эцэг эх, найз нөхдийн шахалт шаардлагаар чи өөрт байгаа төрөлхийн авьяас чадвараа зохих зүйлд нь бус өөр зүйлд зарцуулан түүнийгээ үгүй хийсэн бол хожим харамсаж болох. Ер нь ирээдүйд өөрийн амьдарч буй нийгмийн хууль бус, болж бүтэхгүй элдэв харилцааг эмчилж, зохицуулах хэмжээний “шударга, зөв хүн” болно гэдэгтээ итгэлтэй байгаа бол чамд эрхэм хуульч мэргэжил яг тохирно. Зорилгодоо шударгаар хүрэх нь сайн хуульчийн чадвар байдаг юм шүү. Амжилт хүсье!