Сүүлийн үед ажаад байхад манай хэдэн мэдээллийн сайтууд гайгүй өнгөтэй, өөдтэй гэсэн бүхий л төрлийн гадаад мэдээг голдуу Business Insider гэх сайтаас орчуулж, оруулах болжээ. Арга ч үгүй биз, ганц манайд ч биш дэлхийд “хит” болж байгаа веб сайт шүү дээ, миний л анзаарснаар. Тэгэхээр тус сайтын талаарх зарим мэдээллийг Wikipedia сайтаас иш татан энд оруулахаар шийдлээ.
Business Insider бол Нью Йорк хотод төвтэй, Америкийн бизнес, урлаг уран сайхан, технологийн чиглэлийн, Alexa листийн 193-т эрэмбэлэгдэх веб сайт бөгөөд 2009 оны 02-р сард анхны нийтлэлүүдээ цацаж байжээ. Веб сайт нь голдуу бизнес төрлийн мэдээллийг сонирхолтой хэлбэрээр дүгнэж, харуулаад зогсохгүй, интернэт ертөнцөд хит болж буй бусад мэдээллийг ч цаг алдалгүй хүргэдэг. Редакци нь мэдээлэл бэлтгэх 50 ажилтантай гэх ба анх нээгдсэнээс хойш ойролцоогоор жил хагасын дараагаас буюу 2010 оны 4-р улиралаас ашигтай ажиллаж эхэлжээ. 2012 оны 06-р сар гэхэд 5,4 сая байнгын уншигчтай болсон байна.
Business Insider нь (Орчуулбал: Бизнест талтай хүн) үндсэн сайтын үйл ажиллагаанаас гадна IGNITION тэргүүтэй, хэд хэдэн төрлийн, тэдгээр нь цахим засаглалд ээлтэй аливаа гарааны бизнес моделийг илрүүлэх, хөгжүүлэх зорилготой эдийн засгийн чуулга уулзалтыг зохион байгуулдаг. 2015 оны 01-р сард тэд хөдөлгөөнт хэрэгсэл, төлбөр тооцоо, цахим худалдаа, дижитал медиа салбарын дата, анализ мэдээллийг хүргэх, судалгааны BI Intelligence гэх үйлчилгээг нэвтрүүлсэн байна. Үүнийг Fortune сэтгүүлээс жагсаасан шилдэг 1000 компани, гарааны бизнес эрхлэгчид, дижитал агентлагууд, хөрөнгө оруулалтын гэх мэт компаниуд өөрсдийн үйл ажиллагааны цар хүрээг нэмэгдүүлэхэд, мөн учирч болох эрсдэлээс бизнесээ хамгаалахад ашигладаг гэжээ. Үүнээс гадна Business Insider сайтаас “Дижитал 100: Дэлхийн хамгийн амбицлаг технологийн компаниуд” гэх жагсаалтыг жил бүр гаргадаг байна.
Business Insider 2012 онд шилдэг 500 компанийн нэгээр нэрлэгдэж байж. Мөн Time сэтгүүлээс гаргасан шилдэг 25 санхүү, эдийн засгийн блогоор, PC Magazine сэтгүүлээс гаргасан 2009 оны шилдэг блогийн нэгээр шалгарч байжээ. 2014 оны 01-р сард Нью Йорк Таймс сонин “Бизнес Инсайдерийн хандалт Wall Street Journal сэтгүүлийн сайтын хандалттай эн зэрэгцэж байна” хэмээн мэдээллэж байв. Гэсэн ч тус сайт хэрэглэгчдийг хуурах, төөрөгдүүлэх байдлаар өөртөө хүчээр татах аргыг зарим тохиолдолд ашигладаг нь интернэт хэрэглэгчдийн шүүмжийг ихээр дагуулсаар байна.
Comments