Цахим спорт гэдэг нь видео тоглоомоор хүмүүс хоорондоо өрсөлдөх гэсэн утгыг илэрхийлэх ба өнөөдөр тус чиглэлээр олон тооны тэмцээн уралдаан зохиогдож, олон сая сонирхогчийн хүрээллийг дэлхий даяар бий болгосон нь ойрын ирээдүйд хэдэн тэрбумаар хэмжигдэх томоохон салбар болон хөгжинө хэмээх таамаглалыг зарим судлаачдаас дэвшүүлэхэд хүргэж байна.
Брайс Блум бол Жорж Вашингтоны их сургуулийн Хуулийн сургуульд 2010-2013 онд суралцаж, Juris Doctor зэрэгтэй төгссөн нэгэн. Тэрээр 2015 оноос цахим спортын салбарт өрнөж буй үйл явдлын талаар Reddit сайт дээр бичвэр оруулж эхэлсэн ба 2016 оноос ESPN телевизийн Цахим спортын албанд тус салбарт тулгамдаж буй хууль зүйн асуудал, бизнес хэлэлцээрийн талаар мэдээлэл нийтлэгчээр давхар ажиллаж байна. Чухам энэ үеэс л Блум цахим спортын баг тамирчид төдийгүй кастер, тайлбарлагч нарыг хуулийн аливаа асуудал дээр төлөөлж, харилцах болсон байна.
Түүний зорилго нь “Цахим спортын орон зайд гарч ирж буй олон шинэ challenge, тулгамдсан асуудлуудын хууль зүйн гаргалгааг бүхэлд нь гаргаж, шийдвэрлэх” бөгөөд Deloitte компанийн мэдээлэлд, нэг томоохон тэмцээн 40 мянган үзэгчийг шууд байдлаар, олон сая үзэгчдийг интернэтээр татаж байгаа явдал нь цахим спортын орон зай богино хугацаанд, хурдтай тэлж байгааг илэрхийлэх төдийгүй зарим тохиолдолд, тус салбар сагсан бөмбөгийн салбараас илүү том болсныг баталж байгаа тухай дурдсан байна. Хамгийн ойрын жишээг авч үзвэл, The International 2016 гэх Dota 2 тоглоомын тэмцээнд 16 баг өөр хоорондоо өрсөлдсөн ба түүнийг нь 5 сая үзэгч онлайнаар шууд үзэж, шагналын сан нь 20 сая доллараар хэмжигдсэн үзүүлэлттэй байна.
“Цахим спорт бол хэний ч төсөөлж байгаагүй гоц үзэгдэл юм. Би өөрийгөө цахим спортын хуульч гээд хүмүүст танилцуулахад тэд 1 жилийн өмнөхөөс арай өөрөөр хүлээж авдаг болсон байна билээ” хэмээн тэрээр Unikrn гэх цахим спортын бооцоо бүхий үйл ажиллагаа эрхэлдэг компанийн хуулийн зөвлөхөөр ажиллаж эхлэх үедээ Seatle Times сонинд өгүүлж байв.
Блум ирээдүйтэй бизнест шууд л үсрээд ороод ирчихсэн сүйхээтэй эр биш юм. Түүний бага нас Нинтендо тоглоомтой салшгүй холбогдох ба өнөөдөр хүртэл өөрийгөө gamer буюу тоглоомчин хэмээн илэрхийлэх дуртай. “Тэд бол (gamers) манай талын хүмүүс. Манай хүмүүс жил ирэх бүр нэмэгдсээр байна” хэмээн тэрээр дээрх сонингийн ярилцлагад мөн өгүүлсэн байна.
Эх сурвалж: Findlaw, ESPN
Comments