Ямартай ч зах зээлд худалдаалагдаж буй хэд хэдэн төрлийн уншдаг төхөөрөмжүүдээс хамгийн алдартай нь худалдааны Amazon компанийн хөгжүүлсэн Kindle (гал асах) уншдаг төхөөрөмж юм. Wikipedia хуудаснаас харахад Kindle нь анх 2007 оноос хойш үйлдвэрлэгдсээр өнөөдөр 7-р generation дээр тулж ирээд байна. 7-р үечлэл дээр хийгдсэн Киндлийн 3 загвар байгаа ба тэдгээр нь Kindle Touch, Paper white, Voyage нар юм. Минийх Touch загвар нь бөгөөд нөгөө 2-оо бодоход харьцангуй өмнө гарсан (2014 оны 10-р сард) байна.
Нэг үечлэлийн 3 загвар хоорондын ялгаа нь харагдах байдал, дэлгэцийн нягтрал, гэрэлтдэг эсэх, 3G дэмждэг эсэх, жин, хэмжээ, өргөн нарийнаар зааглагддаг. Авахыг хүсвэл Фэйсбүүкт байрлах интернэт дэлгүүрт хандаарай. Гэхдээ найдвартай газарт нь шүү.
Touch нь багтаамжийн хувьд 4ГБ буюу 1000-аад ном багтаах чадалтай. Нүдэнд ухаалаг утас эсвэл iPad, компьютерийн дэлгэц шиг ачаалал өгөхгүй, наранд гялбахгүй, харин ч тодордог, жижигхэн, хөнгөхөн, цэнэгээ хэдэн 7 хоног барина гэх мэт давуу талуудтай ба хэн хүнийг уйдаахааргүй, зөвхөн уншихад ашиглагдах төхөөрөмж байна. Манай өсвөр үеийнхэн үүгээр интернэт орж болох ч энэ нь тийм ч сайхан санаа биш байх болов уу. Хараал ид гэж, зөвхөн уншдаг юм байна. Нийгмийн сүлжээ, мэйл, элдэв notification цаашаа, намайг амар тайван уншуулаад аль гэдэг төхөөрөмж шүү.
Надад лав ихэд таалагдсан. Дан ялангуяа ухаалаг утас нэг гараараа, зөвхөн өөрийнхөө өмнө барьсаар байгаад дадчихсан нөхдүүдэд бол элэгтэй юм. Яг л өнөөх дэлгэцүүдээ ширтэж байгаа юм шиг мэдрэмжийг өгнө. Заавал 2 гараараа хүнд ном бариад л хуудас эргүүлэх, доош тонгойх шаардлага байхгүй. Гол нь нүдэнд ачаалал өгөхгүй, зүгээр л цаасан материал харж байгаа юм шиг мэдрэмжийг өгдөг нь хамгийн гоё.
Хэлний бядтай хүнд бол англи хэл дээрх номнууд нь төрөл төрлөөрөө олдох юм билээ. Ганц ном гэлтгүй, сонин, сэтгүүл захиалж уншиж болдог. Мэдэхгүй үг таарвал цаанаас нь суугдсан англи толь ашиглаж болдог. Хэрэглэхэд их амархан. Харин манай монгол контент жаахан олдоц муутай. Байгаа нь сайн дурын хүмүүсийн орчуулсан, хөрвүүлсэн хэдэн уран зохиолын номнууд л байсан.
Хэрэв Kindle дээр ном уншихыг хүсвэл, миний л анзаарснаар .mobi өргөтгөлтэй файл л яг гоё таарах юм билээ. Хэдий .pdf тэргүүтэй бас бус формат дэмжинэ гэж байгаа ч тэдгээрийг нь заавал гараар татаж ирээд л дэлгэцээ гүйлгэн унших хэрэгтэй болдог, энэ нь танд их төвөгтэй байх болно. Таны ашиглах .pdf нь анхнаасаа дажгүй томхон фонттой бичигдсэн файл бол зүгээр. Харин .mobi бол тэгэх шаардлагагүй, Microsoft Word програм шиг дэлгэцний дээд хэсгээс зөвхөн фонтныхоо хэмжээг нэмэж, хасахад л хангалттай. Мөн .doc болон .docx файлыг дэмждэг гэж байгаа ч туршиж үзсэнгүй. Магадгүй заавал мэйлээр дамжуулж, хөрвүүлэх шаардлагатай юм шиг. Компьютерээс шууд хуулахад Kindle түүнийг танихгүй байсан. Файл хооронд хөрвүүлдэг програм харьцангуй олон учир энэ тал дээр гайгүй болов уу.
Яваандаа сайт, блогууд дээр нийтлэгдсэн урт урт, гоё нийтлэлүүдийг бөөнөөр нь .mobi болгож байгаад уншина гэж бодоод байна. Тэгэхгүй бол компьютер дээрээс тэдгээрийг унших бас л хэцүү шүү дээ.
Миний анхны сэтгэгдэл нэг иймэрхүү байна. Сүүлд тэгээд Баабарын “Дори идэр дүүдээ”, Ким Вү Жүн “Хорвоо дэлхий уудам, хийх ажил их байна” (англи орчуулга нь Every street is paved with gold мөн үү биш үү?) гээд 2 ном уншсан. Дажгүй шүү, цаашид Kindle дээр бол аливааг уншихад асуудалгүй болох нь ойлгогдсон.
Comments