Товчилбол QC (хуучнаар King’s Counsel буюу Хааны Зөвлөх) гэдэг нь Английн Хаант Засаглалын үеэс улбаатай, Английн хуульчдыг Хууль зүйн салбартаа мэргэшсэн болохыг нь баталсан статус буюу хуульчийн зэрэглэлийн нэг хэлбэр юм. Энэхүү зэргийг Хатан Хаан олгох бөгөөд ялангуяа шүүхэд ажилладаг хуульч буюу өмгөөлөгч, прокуроруудад нэр хүндийн илэрхийлэл нь болдог байна. Харин Хатан хааны захиргаан дахь Хамтын Нөхөрлөлийн бүсийн зарим улсуудад QC бус, Ахлах Зөвлөх, Ахлах Өмгөөлөгч, Ерөнхийлөгчийн зөвлөх гэсэн хэд хэдэн нэршлүүдээр орлуулагдан хэрэглэгддэг.
Тавигдах шалгуур нь нэр дэвшигчийн хуулийн салбарт гаргасан гавьяа, зүтгэлээр үнэлэгдэх бөгөөд мөн доод тал нь 15 жил мэргэжлээрээ тасралтгүй ажилласан байхаар заасан.
Ийнхүү нэгэнт зөвлөх болсон бол бусдаас онцгой хийцтэй “торгон” нөмрөг хүртэж, өмсдөг бөгөөд үүнийг хар ярианд “Taking silk” буюу торго хүртэх хэмээн нэрлэдэг. Тиймээс ч нэг талаар тэд Silks хэмээн дуудагддаг байна.
Comments