Сургалтын ерөнхий төлөвлөгөөний дагуу хуулийн сургуулийн оюутнууд судлах ёстой зарим хичээлээ өөрсдөө сонгож, суралцдаг билээ. Хэрэв та энэ сонголтын өмнө ирсэн, шийдвэрээ хараахан гаргаагүй байгаа бол The Girl’s Guide to Law School сайтын нийтлэгч Lee Burgess дараах зөвлөгөөг өгч байна.
Сургуулиа төгсөхөд ямар шаардлага тавигдаж байна, хараарай. Энэ талаар мэдээлэлгүй байгаа бол сургуулийнхаа веб сайтанд хандах, оюутны гарын авлага байдаг бол судлах, эсвэл сургалтын албандаа хандахыг зөвлөж байна. Төгсөхөд ямар хичээлүүдийг судалсан байхыг шаардаж байна? Дипломын ажил заавал бичихийг шаардсан байна уу гэдгийг шалгаарай. Төгсөлтийн үеэр ямар нэгэн асуудал гарах ёсгүй гэж бодож байгаа бол эдгээрийг шалгаад үзчихэд гэмгүй юм.
Сайн багшийн хичээлийг сонго. Би сургуульд байх үедээ өөрийн багш/ментор хүнээс чухам ямар хичээлийг сонгох хэрэгтэй талаар зөвлөгөө авах гэхэд тэрээр: “Алийг нь сонгох вэ гэдэг чухал биш, харин хэн заах вэ гэдэг нь чухал” гэсэн юм. Багш маань намайг заах арга барил сайтай, оюутнуудтай эелдэг харилцдаг, хичээл заалгахыг дотроо хүсч байсан багш нарын маань хичээлийг сонгохыг зөвлөсөн юм даа. Криминалистикийн хичээлийг сонголоо ч гэсэн түүнийг сураад авчихсан байхад хэрэгтэй шүү дээ.
Шалгалтын хуваарийг нь урьдчилан хараарай. Олон оюутан өөрсдийн төлөвлөгөөндөө энэ талаар тусгахаа мартдаг. Тэгээд нэг л өдөр хэтэрхий оройтсон болохыг ойлгоно доо. Юу вэ гэхээр, суурь хичээлүүд болон таны сонгосон хичээлүүдийн шалгалтын хуваарь хэтэрхий ойрхон байхаар сургалтын төлөвлөгөөнд тусгагдсан байх вий. Сурсан зангаараа давчуу хугацаанд шалгалтанд бэлтгээд ордог, хангалтгүй дүн авдаг, гэтэл хуулийн сургуульд амжилттай сурахын нэг түлхүүр нь улирлын шалгалтыг амжилттай давах байдаг шүү дээ. Шалгалтын хуваарь харж байж, хичээл сонголтоо хий гэх гэсэнгүй, гэхдээ энэ тухай бодоод үзчихэд илүүдэхгүй юм шүү.
Мэргэжлийн дадлага, цагийн ажилд тавигдах шаардлагуудыг нягтла. Оюутнууд хуулийн сургуульд суралцах үеэр давхар мэргэжлийн дадлага болон цагийн ажил хийхийг хүсдэг. Энэ тохиолдолд, ажил олгогчоос Нотолгооны онолын хичээлийг заавал судалсан байхыг шаарддаг юм. Иймд энэ тал дээр анхаараарай гэж зөвлөх байна.
Дараагийн улирлын хичээлийн төлөвлөгөөг хараарай. Юу вэ гэхээр, хуулийн сургуулиас сонгох хичээлийг зөвхөн II улиралд санал болгодоггүй. Иймд танд өнөөдөр сонгохыг санал болгож буй хичээлүүдээс дараагийн улиралд эсвэл дараагийн хичээлийн жилд сонгож болох эсэхийг судлаарай.
Баарын шалгалтанд бэлтгэх хичээлүүдийг сонгох шаардлагатай эсэх талаар эргэцүүл. Баарын шалгалтанд бэлтгэх хэд хэдэн төрлийн анги/хичээл байх ба та бүгдийг нь нэг дор сонгон суралцах шаардлагагүй болов уу. Хичээлийн улирал бүр цөөн тоогоор сонгоод явбал зүгээр.
Хүсэл сонирхлоо дага. Хичээлийн жилийн хоёрдугаар улирлын хамгийн гоё нь та ямар хичээл судлахаа өөрөө сонгодог. Сонгох хичээлүүд дундаас таны хүсэл сонирхлыг татсан хамгийн багадаа нэг хичээлийг сонгоод үзэхэд гэмгүй. Цаашлаад, түүндээ дур сонирхолтой байгаад зогсохгүй, өөрийн мэргэших чиглэлээ олох ч юм билүү. Гол нь энд ихэнх хүмүүсийн хувьд сонгох шаардлагагүй гэж үздэг боловч таны сонирхлыг үнэхээр татаж буй тэр нэгэн хичээлийн талаар ярьж байгаа юм шүү гэдгийг ойлгоорой.
Сурахын хажуугаар ажил хийх эсэхээ тодорхойл. Хэрэв сурахын хажуугаар мэргэжлийн бус цагийн ажил хийхээр төлөвлөж буй бол цаг заваа хэрхэн зохицуулах талаар эртнээс бодсон нь дээр. Жишээ нь, хичээлүүдээ 7 хоног бүрийн цөөн өдөрт багтаан бөөнд нь судлаад, үлдсэн өдрүүдэд нь ажиллах сонголт хийж болно шүү дээ.
Дүнгийн голчид санаа зовж байна уу? Олон оюутан диплом дээрх дүнгийн голчдоо санаа зовдог байх. Хэрэв түүнийг өндөр байлгахыг хүсвэл, танай сургууль хичээл бүрийн үнэлгээг ялгаатай үзүүлэлтээр тогтоодог эсэхийг олж мэдээрэй. Сонгох хичээлүүдийн үнэлгээг үндсэн суурь хичээлүүдийн үнэлгээтэй харьцуулахад A, B дүн авах нь харьцангуй их байдаг байна. Ухаандаа, үндсэн суурь хичээлүүдийн шалгалтанд танай сургуулийн захиргаа болоод багш нар чанга хатуу ханддаг байж болно, харин нэмэлт, сонгох хичээлүүд дээр арай зөөлөн байж болох юм гэсэн санаа.
Хашир бай. Өөрийнхөө түүхийг шударгаар өгүүлэхэд, сургуульд сурч байхдаа кредит буюу багц цаг өндөртэй олон хичээлийг нэг улиралд судлахаар сонгочихсон юм, дээр нь сургуулийнхаа Law Review сэтгүүлд ажиллаж байсан учраас миний хувьд хийх ажилдаа маш ихээр дарагдсан. Тухайн үед сурч байсан үеэ бодохоор одоо гоё сайхан санагддаггүй юм. Иймд өөрийнхөө боломж нөхцөлд тааруулж, энэ тал дээр хашир хандах хэрэгтэй. Цаашлаад илтгэл, мэтгэлцээний тэмцээнүүдэд бэлтгэж орохоор төлөвлөж буй бол их цагаар ордог, кредит өндөртэй хичээл сонгохоос түр хугацаанд татгалзаарай гэж зөвлөх байна.
Мэдээний эх зургийг: TeroVesalainen, Pixabay
Comments