Бизнесийн үйл ажиллагаа эрхэлж буй компаниуд үйл ажиллагаагаа иргэдэд сурталчлах, үйлчилгээгээ зах зээлд таниулахын тулд жил бүр тодорхой хэмжээний төсөв мөнгийг зар сурталчилгаанд хуваарилдаг. Орчин үед мэдээлэл дамжуулах эх үүсвэр олон болсон тул телевизийн сувгаас гадна фм радио, сонин сэтгүүл, веб сайт, сошиал сүлжээ гэх мэт олон сонголт хуульчдын өмнө бий болсон байна.
Түүх сөхвөл, АНУ-ын Баарын холбооноос 1908 онд Хуульчийн мэргэжлийн ёс зүйн дүрмийг баталж, хатуу хязгаарлалт тогтоох хүртэл хугацаанд энэ салбарын реклам сурталчилгаа ямар ч зохицуулалтгүй байв. 1976 онд Жон Бэйтс болон Ван Оустин гэх 2 америк хуульч хамтран нэгэн хуулийн фирм байгуулсан ба тэд дунджаас доогуур орлоготой иргэдэд боломжийн үнээр хууль зүйн зөвлөгөө өгч ажиллахаар төлөвлөж, энэ тухай мэдээллийг иргэдэд хүргэх үүднээс орон нутгийн хэвлэлд реклам нийтлүүлсэн байна. Гэтэл Аризона мужийн Баарын холбоо тэднийг хуульчийн дүрэм зөрчсөн хэргээр үйл ажиллагаа эрхлэх зөвшөөрлийг нь 6 сар хураах нь тэр. Бэйтс болон Оустин нар үүнийг хэрэглэгчийн эрх ашиг, шударга өрсөлдөөнийг хамгаалсан Шэйрманы акт болон Үндсэн хуулийн 1-р өөрчлөлтийн зүйл заалтыг зөрчсөн шийдвэр гээд АНУ-ын Дээд шүүх хүртэл заргалдсан ба Дээд шүүхээс Луйс Голдфарбын эсрэг Виржиниа мужийн Баарын холбооны хэргийн шийдвэрийг иш татаж, Аризона мужийн Баарын холбоо иргэдийн мэдээлэл хүлээн авах эрх чөлөө, мэдэх эрх чөлөөг хязгаарласан байна хэмээн тогтоосон байна. Үндсэндээ 1977 оноос хойш хуульчийн үйл ажиллагаагаар дагнасан маркетинг, сурталчилгааны ПР компаниуд АНУ-д олноор бий болж, өнөөдрийг хүрчээ.
Ингээд уншигч та бүхэнд, мөн зарим хуульчдад мэдээлэл болгох үүднээс интернэтэд байршсан, хуульч, хуулийн фирмтэй холбогдох 12 видео сурталчилгааг онцлон хүргэж байна.
/Тайлбар нь дээрээ, эх видео нь доороо байрлалтай байгаа/
- Техасын харцага Брайн Вилсон. Түүний өөртөө итгэлтэй байдал, чанга дуугаар хашгичсан хэв маяг, сурталчилгааны өвөрмөц хийц зэрэг нь интернэт хэрэглэгчдийн анхаарлыг маш ихээр татсан байна. Энэ бол ямар нэгэн хуурамч зүйл, пароди биш шүү. Брайн үүнийхээ хариуд мэргэжил нэгт зарим нөхдөөс маш их шүүмжлэл хүлээн авсан байна.
- Эрүүгийн эрх зүйгээр мэргэшсэн хуульч Жэйми Касиногийн энэхүү реклам магадгүй YouTube дээрх хамгийн олон үзэлттэй нь байх. 2012 онд түүний дүү орон нутгийн цагдаа нарын буруутай үйл ажиллагааны улмаас өөрийн машинд буудуулж нас барсан тухай Касино ярина. Энэ нь ч үнэхээр бодит түүх ажээ. Тэрээр энэхүү рекламыг ойролцоогоор 100,000 доллараар бүтээж, үзэгчдэд хүргэсэн байна.
- 2 ази, 1 африкан америк гээд 3 нөхрийн байгуулсан хуулийн фирмийн сурталчилгаа бололтой. Анх харахад энэ үнэхээр байгууллагын сурталчилгаа мөн гэж үү хэмээн бодмоор. Хөгжилтэй ч юм шиг. Хэрэв та видеоны төгсгөлийг харвал, “Зөв хуульч сонгох нь маш чухал бөгөөд тэднийг телевизийн сурталчилгаа болон сагсан бөмбөгийн чадвараар нь үнэлэн, сонгох нь учир дутагдалтай” гэсэн текст харагдана.
- Гэмт хэрэгтэн шиг төрхтэй эрүүгийн өмгөөлөгч Дэн. Тус сурталчилгаанд баахан бүтэхгүй нөхдүүд манай хуульчид талархал илэрхийлээд л. Дэн үргэлжлүүлэн, “Америк эрх чөлөөний орон болохоос мөнгөтэй нэгэн нь таны юу хийх үгүйг хуулиар заадаг газар биш. Хуулийг таны талд ашигтайгаар ашиглаж болно” хэмээнэ. Түүний гол санаа нь: “Гэмт хэрэгтэн та таныг ойлгох, итгэлтэй нэгнийг хуульчаараа сонгоорой” юм.
- Хэрэв та Breaking Bad гээд телевизийн олон ангит кино үзсэн бол Саул Гүүдман хэмээх хуульчийн талаар мэдэх байх. Тэрээр бүтэхгүй нөхдүүдийг шүүхэд төлөөлж, бусад үед тэдний бүхий л хуулийн асуудлыг нь хариуцдаг билээ. Сонирхолтой нь тэрээр бодит хуульч аятай хэд хэдэн телевизийн сурталчилгаатай, бүр веб сайттай байх юм. Түүний талаар илүү ихийг мэдэхийг хүсвэл Better Call Saul гээд өөрийнх нь киног үзээрэй.
- Мөн л Breaking Bad кинон дээр гарч байсан нэгэн мафийн дүр. Тэрээр Bergener Law фирмийн сурталчилгаанд тоглосон байна. Тодруулбал, мань хүн өөрийгөө эрүүгийн ертөнцийн Чак Норрис л гээд байх шиг байна. Энэ рекламны хийц надад их таалагдсан шүү. Илүү дутуу зүйл байхгүй, цэвэрхэн, бусдыгаа бодвол харьцангуй мэргэжлийн хийцтэй.
- Хэрэв таны эхнэр эртнээс салах тухай зэхэж байсан бол яах вэ? Танд хэрэгтэй зүйл бол гэр бүлийн эрх зүйгээр мэргэшсэн, эрчүүдийн эрхийг хамгаалагч, эмэгтэй өмгөөлөгч Мэрилин Йорк юм. Бас л сонирхолтой маркетинг хийж байна гээч.
- Хэрэв та хэн нэгний буруутай үйл ажиллагааны улмаас гэмтэж бэртсэн, сэтгэл санааны хохирол амссан бол манай хуулийн фирмд хандаарай. Хуульчид ч бас та нартай адил зүрх сэтгэлтэй, гэмтэж бэртдэг хүмүүс байдаг юм шүү гэсэн мессэж өгч байна. Гол нь эмэгтэйн тэрхүү уналт үзэгчдийн анхаарлыг маш хүчтэй татаж байгаа юм.
- Тэрээр телевизийн хөтөлбөрт угаас их оролцдог хүн бололтой, бүр Fox агентлаг хүртэл түүний байр суурийг сонссон байна шүү дээ. Эрүүгийн эрх зүйн өмгөөлөгч, судлаач гэх энэхүү эрхэм дээрх сурталчилгаанд өөрийгөө технологид ач холбогдол өгсөн, орчин үеийн хуульч болохоо мэргэжлийн хэмжээнд үзүүлсэн байна. Жагсаалт дундаас хамгийн өндөр төсвөөр бүтсэн реклам гэж бодож байна.
- Хаха, түүний нэр хэн бүхний анхаарлыг татмаар юм гээч, доромж утга агуулахыг хүсээгүй юм шүү. Нэг нөхөр телевизийн сувгаар Hire Dick! гээд байхаар хүмүүс сониуч юм болохоор заавал очиж харна биз? Сул талаа давуу тал болгон ашиглана гэдэг л энэ байх. Бас тэрээр утасны дугаараа чихэнд хоногштол хэлэх юм. Даатгалын хуульч хэрэгтэй юу? Дикийг хөлслөөрэй.
- Жагсаалт дундаас хамгийн даруу нь гэх юм уу, хуульчийн сурталчилгаа нэг ийм л баймаар даа хэмээн хүмүүст бодогдохоор хийцтэй юм. Хууль, шүүхийн амьдралтай хүүхэд наснаасаа холбогдсон тэрээр ёстой л хуульч болох заяа төөрөгтэй байж гэмээр юм уу?
- Монгол улсын хуульчдыг төлөөлүүлээд нэг видео реклам орууллаа. Интернэтээс хайж үзлээ, үүнээс өөр үр дүн гарч ирдэггүй шүү. Магадгүй манайхан арай ондоо аргаар үйлчлүүлэгчдээ олдог байх. Заяа энд Золоо хуулийн фирмийн сурталчилгааг үзвэл болхи хийц, найруулга ажиглагдана. Угаасаа хуульчдын сурталчилгаа дийлэнх нь ийм байгааг та анзаарсан уу?
Comments