Бодит байдал заримдаа олон шалтгааны улмаас гуйвдаг. Нэг шалтгаан нь кино юм. Үр дүнд нь үзэгчид буюу энгийн иргэд хуульчдын талаар буруу ташаа ойлголтыг тэрхүү киноноос авч үлддэг. Кинон дээр хамгийн ихээр өгүүлэгдэх хуульчдын талаарх 4 ташаа ойлголтыг доор нэрлэж бичлээ.
ХУУЛЬЧИЙН ТӨЛБӨР ҮНЭТЭЙ БАЙДАГ
Хамгийн эхний ташаа ойлголт бол иргэд хуулийн туслалцаа авахаар хуульч хөлсөлбөл хариуд нь өндөр төлбөр төлөх хэрэгтэй болдог. Яахав, өндөр зэрэглэлийн хэрэг маргаан буюу жишээ нь хэргийн нөхцөл байдал өөрөө ээдрээ төвөгтэй, цаг хугацаа их шаардах, шүүх хурлын бэлтгэл ажил ихтэй зэрэг хэргийн хувьд үйлчилгээний хөлс үнэтэй тусч болно. Харин энгийн хэрэг буюу жишээ нь бусад хувь хүн, байгууллагаас танд учруулсан хохиролтой холбогдох маргааны хувьд төлбөр өндөр гардаггүй. Ихэнх хуульч, хуулийн фирмүүд таныг шүүх хуралд ялж, нөхөн олговор авах хүртэл үйлчилгээний хөлс суутгадаггүй практик амьдрал дээр нэгэнт тогтжээ. Хуульчид зөвхөн хийсэн ажилдаа тохирох үйлчилгээний хөлсийг таниас нэхэмжлэх ба энэ нь олон хүмүүсийн ярьдаг шиг үнэтэй байдаггүй байна.ШИЙДЭЛ ЭЦСИЙН МӨЧИД Л ОЛДДОГ
Кинон дээрээс харахад, хуульчид хэн нэгний хийсэн үйлдэл, хэлсэн үгнээс санаа авч, гэнэт ухаан орсон аятай, кино дуусах эцсийн мөчид л нэг юм хэргийн шийдэл, гол зангилааг нь олж харагддаг. Гэвч энэ бол бодит байдал биш юм. Хуульч болон хуулийн фирмүүд аливаа хэрэг маргаанд холбогдох боломжит шийдэл, ашигтай хувилбарыг боловсруулж, нээхийн тулд шүүх хурал болох хүртэл өчнөөн цагийг зарцуулдаг. Зарим үед гаргалгааг нь тэр дор нь олчих нь бий. Хэргийн нөхцөл байдал ямар ч байсан бай, олон хуульч шүүхээр ашигтай шийдвэр гаргуулахын тулд түүнээс өмнө хэргийг шийдвэрлэж болох олон хувилбар боловсруулсан байдаг байна.ШҮҮХЭЭР Л ШИЙДВЭРЛҮҮЛДЭГ
Хуулийн асуудал болон зарим нөхцөл байдлыг аль нэг тийш нь шийдвэрлэхэд шүүх ажиллагаа л ганц гаргалгаа нь байдаг мэтээр олон хүн ойлгодог. Нэг үнэн зүйл юу вэ гэвэл, таны хуульч нөхцөл байдлыг юун түрүүнд эв зүйгээр, шүүхээс өмнөх шатанд нь зохицуулж, шийдвэрлэхийн төлөө ажиллах болно. Талууд шүүхэд нэхэмжлэл гаргаж, цаг хугацаа, эд хөрөнгө зарлагадахгүйн тулд хаалттай хаалганы цаана өчнөөн уулзалт зохион байгуулах явдал их байдаг.БАЙНГА ОРИЛЖ, ХУРЦ ШИРҮҮН ҮЙЛДЭЛ ХИЙДЭГ
Кинон дээрх хуульчдыг харвал, тэд хүмүүсийн өмнө өндөр дуугаар ярьж, цаас шидэж, хурц ширүүн үйл хөдлөл гаргаж байгаа харагддаг. Гэвч бодит байдал дээр хуульчид сэтгэл хөдлөлөө удирдаж, үйлчлүүлэгчийнхээ нэрийн өмнөөс ёс зүйтэй ажиллах хэрэгтэй болдог. Хэрэв та шүүх хурлын танхимд орвол хурлын процесс маш уйтгартай явагддаг болохыг ойлгох болно.Эх сурвалж: Harron Law
Comments