Хичээлийн жилийн энэ үед оюутнууд өөрсдийн бичсэн эрдэм шинжилгээний бүтээлийг хуулийн сургуулиудын дэргэдэх law review төрлийн сэтгүүлд нийтлүүлэхээр илгээж, редакцид нь орж ажиллах найдвар давхар тавьсан байдаг. Мэдээж хэрэг сэтгүүлийн редакцид ажиллана гэдэг амаргүй ажил ч гэсэн ашигтай талууд бас бий.
Тэгэхээр өөрийн бичсэн бүтээлийг сэтгүүлд нийтлүүлэхээр илгээх үү эсвэл редакцид нь орж ажиллах уу гээд эргэлзэж буй хүмүүст хуулийн сэтгүүлд хувь нэмрээ оруулах нь таны академик амжилтанд нөлөөлдөг гээд 5 давуу талыг нэрлэлээ.
Таны ерөнхий мэдлэг сайжрах болно. Хуулийн салбарт тэмдэглэгдэн үлдсэн алдартай кэйсүүдийг нэрлэх, латин болон онолын нэр томьёог мэдэж авах, аливааг гүнзгийрүүлэн судлах, бусдын эрдэм шинжилгээний бүтээлийг унших нь хуулийн сургуульд суралцах хугацаан дахь таны өөртөө итгэх итгэлийг нэмээд зогсохгүй, хожим практик дээр гарсан ч алзахгүй байх нөхцлийг бүрдүүлж өгөх болно.
Сайн, муу бичигдсэн бичвэртэй ажиллах нь таныг илүү сайн бичдэг чадварт сургана. Редакцруу илгээсэн бусдын өгүүллийг унших, засч сайжруулах санал илгээх тусам тэр хэрээр таны бичих чадвар сайжирч байдаг. Мэдээж хэрэг, үүнээс гадна зөв бичих дүрэм, сайн бичвэр ямар байх ёстой гээд олон зүйлд та суралцана – өөрөөр хэлбэл, та товч, тодорхой харилцах харилцаанд давхар суралцах болно.
Цагийг хэрхэн үр дүнтэй зарцуулах аргад суралцана. Хуулийн сэтгүүлийн редакцид ажиллах нь танаас багагүй цаг шаардах болно. Нэгдүгээр курсын оюутан бол хуулийн сургуульд цаг ямар бага байдаг билээ гэдгийг мэддэг болсон байх. Ийм нөхцөл байдалд хичээлдээ анхаарлаа хандуулна, мөн редакцид давхар ажиллана гэдэг нь таныг цагийн менежментээ зайлшгүй сайжруулахад хүргэх юм.
Та шинэ ментортой болно. Хуулийн сэтгүүлийн редакцид ажиллах нэг давуу тал нь өөрөөсөө дээд курсийн оюутнуудтай шинэ харилцаа холбоо тогтоодог явдал. Хэрэв та нэгдүгээр курс бол нэгдүгээр курсын оюутнуудтай л цуг суралцах болно. Яахав курс ахих тусам байдал арай өөрчлөгдөж болох ч, өөрөөсөө дээд түвшний оюутнуудтай цуг ажиллах нь та одоо байгаагаасаа илүү харилцаа холбоо, туршлага бүхий бусдаас илүү нөөцтэй боллоо л гэсэн үг.
Багаар ажиллах чадварт суралцдаг. Хуулийн сургуулийн орчин таныг бусдаас илүү хүчтэй, мэдлэгтэй байхыг шаарддаг. Өөрөөр хэлбэл, багаар ажиллах чадварт сургадаггүй. Харин хуулийн сэтгүүлийн редакцид ажиллах орчин өөр. Тэнд та багаар ажиллах чадварт суралцдаг. Энэ нь таныг аливаа асуудлыг нэг толгойгоор шууд шийдвэрлэхээс илүү бусадтай хамтарч хэлэлцээ хийх, эвлэрэх, шүүх танхимд ажиллах практик аргад суралцахад тань сайнаар нөлөөлөх болно.
Law review төрлийн сэтгүүлийн редакцид ажиллах эсэх нь таны мэдэх хэрэг. Гэвч таны харсанчлан, үүний цаана олон давуу талууд нуугдаж байдаг байх нь.
Эх сурвалж: lawschoolacademicsuccess.com
#Зургийг ualr.edu хуудаснаас
Comments