Хуулийн сургуулийн талаарх худал 5 цуу яриа

Энэхүү видеоны интернэт холбоосыг өдгөө Канадын Оттавагийн их сургуулийн Хуулийн сургуулийн 2-р курсийн оюутан Линэйягийн Ютүб сувгаас авав. Тэрээр тус видеонд хүмүүсийн дунд хуулийн сургуулийн талаар хамгийн ихээр яригддаг 5 худал цуу яриаг онцолж, бодит байдалтай харьцуулсан байна. Видео бичлэгийн агуулгыг доор текст хэлбэрээр оруулав.

ХУУЛИЙН СУРГУУЛЬД ЧӨЛӨӨТ ЦАГ ГАРДАГГҮЙ

Тэгэхээр энэ бол худал яриа. Танд чөлөөт цаг хангалттай гарна, гагцхүү түүнийг та зөв ашиглаж чаддаг байх хэрэгтэй. Мэдээж тэрхүү цаг хугацаа тодорхой хэмжээнд хязгаарлагдмал байна. Гэвч хичээлийн дараа номын санд сууж зарцуулах цагийг хааяадаа найзуудтайгаа хамт гарч өнгөрүүлэх байдлаар ашиглаж болно шүү дээ. Энэ үед таны сэтгэл санаа сэргэж, та тэднээс эрч хүч, мотивац олж авах учир зарим тохиолдолд, хуулийн сургуулиас гадуур чөлөөт цагаа өнгөрөөх нь бидний хувьд зайлшгүй байх явдал юм. Гол нь та өөртөө зориулж цаг гаргаж чаддаг байх хэрэгтэй.

МЭРГЭШИХ САЛБАРАА ЭРТНЭЭС ТОДОРХОЙЛСОН БАЙХ

Энэ бол мөн л худал яриа. Миний хувьд би одоог хүртэл аль эрх зүйн чиглэлээр дагнаж, суралцахаа олж, тодорхойлоогүй байна. Энэ бол огтоос санаа зовох хэрэггүй, хэвийн зүйл. Хуулийн сургуульд суралцах явцад та олон төрлийн лекц үзэж судлах бөгөөд энэхүү урт хугацааны процесс дундаас та чухам аль эрх зүйн салбарт талтай болон сонирхолгүйгээ олж, мэдэх боломжтой юм.

Хуулийн сургууль дээр надтай уулзаж байсан элдэв хүмүүс болон багш, професорууд хэлэхдээ, тэд нэг салбараас эхлээд нөгөөрүү нь шилжих байдлаар ажиллаж, суралцаж байж эцэст нь одоогийн байр сууриа олсон гэж байсан. Өөрөөр хэлбэл, ихэнх хүмүүс шууд бус байдлаар мэргэших салбараа тодорхойлдог байна. Тиймээс, хуулийн сургуульд суралцаж байх хугацаандаа та аль болох олон хичээлийг сонгон суралцаж байгаарай.

ХУУЛИЙН СУРГУУЛЬД ТАНЫ ЗЭРЭГЛЭЛ ХАМГИЙН ЧУХАЛ

Би сургууль болон ангидаа хэддүгээрт эрэмбэлэгддэг болохоо мэдэхгүй байна. Гэхдээ юу гээч, энэ бол асуудал биш юм. Анхаарах ёстой асуудал нь, та суралцах хугацаандаа өөрийгөө хамгийн ихээр дайчилж, хичээнгүй байх хэрэгтэй. Та өөрөө өөртөө хамгийн сайн нь байж чадах юм бол бусад нь ердөө асуудал биш. Мэдээж хэрэг, бусдын дэргэд хамгийн сайн нь байж харагдах cool ч гэсэн, энэ нь хэрэв та доор эрэмбэлэгдвэл – ажилд орж чадахгүй, та ухаан муутай, та хичээхгүй байнаа гэсэн утгыг илэрхийлэхгүй юм. Хуулийн сургууль олон төрлийн сонирхол, мэргэжил бүхий хүмүүсээс гагцхүү шилдэгийг нь элсүүлж авдаг тул тэд бүгд л ухаантай, бүгд л хичээнгүй байх болно. Ийм нөхцөл байдалд тэднээс зарим нь дээр, зарим нь доор эрэмбэлэгдэх нь гарцаагүй зүйл. Хэрэв та өөрөөрөө хамгийн шилдэг нь байж, өөрийгөө байнга хөгжүүлж чаддаг байх юм бол хаана, хэддүгээрт эрэмбэлэгдэх нь огтоос санаа зовоох асуудал биш болох юм. Харин хуулийн сургуулиа төгсөөд, амьдралд хөл тавиад эхлэх үеэр тавигдах гол асуудал нь юу вэ гэвэл, таны ямар хүн болох, таны юу хийж чадах вэ гэдэг байдаг.

ХУУЛИЙН СУРГУУЛЬ БОЛ 4 ЖИЛИЙН ТУРШ ҮРГЭЛЖЛЭХ СТРЕСС

Хуулийн сургуульд хийх зүйл их байдаг учир стресстэх үе багагүй гардаг – яг л амьдралд тохиолдох үйл явдлууд гэнэтийн, тааварлашгүй байдагтай адил. Биднийг дунд сургуульд суралцаж байх үед ч гэсэн бага хугацаанд их зүйл амжуулах шаардлагатай үе олон тохиолддог байсан. Хэрэв та өмнө нь ийм зүйлтэй тулгарч байгаагүй бол азтай юм. Ямартай ч хуулийн сургуульд суралцах 4 жил тасралтгүй үргэлжлэх стрессээр дүүрэн байхгүй. Дунд нь хөгжилдөх, амрах үе зөндөө тохионо, мөн та бид зуны улиралд бүтэн амарч, өвлийн улирлаар хэсэг хугацаанд амрах болно.

Ядаргаанаас хол байхын тулд дээр дурдаж байсанчлан, та өөртөө амрах, эрч хүч авах, хөгжилдөх цагийг гагцхүү гаргадаг байх хэрэгтэй. Та амьдралын олон төрлийн шалгууртай хэзээд нүүр тулгарна, хожим хуульч болсон ч гэсэн олон төрлийн асуудалтай тулгарсаар байх болно. Тиймээс таны хийх ёстой зүйл бол, стресстэх үедээ аливааг тайвнаар хүлээн авч, өөрийгөө сэргээх болон тайвшруулах ямар нэгэн өвөрмөц аргатай болох явдал юм.

ХУУЛИЙН ОЮУТНУУД ХЭЗЭЭД БИЕ БИЕНИЙХЭЭ ӨРСӨЛДӨГЧ БАЙДАГ

Үүнийг би худал цуурхал гэж хэлмээр байна. Учир нь миний хувьд, хуулийн сургуульд элссэн эхний жилдээ дотны найзуудтай болж, олон нөхөрсөг хүмүүстэй танилцсан байдаг. Тэдний дийлэнх нь дажгүй зан ааштай, маш нөхөрсөг, мөн тусархаг хүмүүс байсны дээр манай сургууль оюутнууд хоорондын харилцаа, хамтран суралцах үйл ажиллагааг дэмжих бодлого баримталдаг нь надад тааламжтай санагдсан. Харин уралдаан тэмцээний хувьд, та дотроо бусдаасаа арай илүү сайн нь байхыг хүснэ, арга хэмжээнд амжилттай оролцохыг хүсдэг, өөрөөр хэлбэл, бусад оюутнуудтай хөл нийлүүлэх, тэднээс хоцрохгүй байх, тэдэн шиг хичээнгүй байх гэсэн жижиг хэмжээний өрсөлдөх гэсэн бодол санаа хэн хүний ард нуугдаж байдаг – энэ бол мэдээж байдаг л хэвийн зүйл. Нэмж хэлэхэд, тантай хамт суралцаж буй хүмүүс харилцан адилгүй туршлагатай, амьдралаас хүсдэг зүйл нь ондоо, өөр өөр чиглэлийн хуульч болохыг хүсдэг гэх мэт бидний зорилго харилцан адилгүй байдаг учир та тэдэнтэй шууд байдлаар өрсөлдөгч байж чаддаггүй. Магадгүй олон оюутан гэр бүлийн эрх зүйгээр мэргэшиж, ажиллахыг хүснэ, зарим нь хотын төвд ажиллаж амьдрахыг, цөөн хэд нь экологийн эрх зүйгээр дагнан суралцахыг хүснэ. Таны хувьд, та өөрийнхөө онцлог болон давуу талыг эхлээд тооцож үзэх хэрэгтэй. Сургууль төгсөөд, хэн нь эхэлж ажилд орох вэ гэдэг уралдаанд та ороогүй шүү дээ. Хэрэв та шаргуу байж, тавьсан зорилгоо гүйцэлдүүлэх аваас тэр нэг цэгрүү хичнээн хүн зэрэгцэж тэмүүлсэн бай хамаагүй та хүссэн цэгтээ хүрч чадна. Мөн тэрхүү цэгт та шууд бус байдлаар ч хүрч болно. Миний уулзсан хүмүүсээс цөөхөн хэдэн хуульч л өөрсдийн мэргэшихийг хүссэн салбараа эртнээс тодорхойлж, суралцсан байдаг юм билээ. Ихэнх нь олон саад, даваа бэрхшээл туулан байж, одоогийн байр суурин дээр ирсэн байдаг. Тиймээс та юу өөрийг тань онцгой болгодог болохыг санаж, бусадтай мөнхийн өрсөлдөөнд байгаа мэтээр аливаад бүү хандаарай. Учир нь та бусдаас өөр, ер бусын нэгэн билээ.