Хэн нэгний хувьд эзэмшсэн мэргэжлээрээ хууль зүйн фирмд ажиллах хүсэлтээ илэрхийлэх ярилцлаганд орох нь зориг-зүрх шаардсан ажил гэж хэлмээр байна. Өнгөрсөн 4-5 жилд суралцсан шаргуу хөдөлмөрийн тань үр шимийг цаг хүрэхгүй хугацаанд дүгнэх ийм эрсдэлтэй нөхцөлд, таны хувьд ажлын ярилцлаганд сайтар бэлтгэсэн байх нь чухал юм.
Уншиж буй ном, дэвтрээ түр орхиод, гүнзгий амьсгаа аван, сонирхож байгаа ажлын байрыг тань өөрийн болгоход туслах дараах 7 зөвлөгөөнд анхаарлаа хандуулна уу.
СУДАЛГАА ХИЙ
Магадгүй та энэ талаар өмнө нь уншиж байсан байх. Тэнд дурдсанаар, таны зайлшгүй хийх ёстой нэг зүйл бол Судалгаа юм. Ажил олгогчийн хувьд тэдний байгууллага юу хийдэг, ямар чиглэлээр мэргэшсэн үйл ажиллагаа эрхэлдэг, өнгөрсөн хугацаанд бүтээсэн түүх зэргийн юуг нь ч мэдэхгүй хүнтэй ярилцах шиг хэцүү зүйл байхгүй.Үнэн хэрэгтээ, тэрхүү фирмийн хүрэх гээд тэмүүлж буй зорилго, алсын хараа нь юу юм, он цагийн товчоо, нийгмийн хариуцлагын хүрээнд хийж хэрэгжүүлсэн ажлын талаар мэдээлэлтэй байх нь танаас ярилцлага авч буй хүмүүст сонирхолтой, тэдний сэтгэлийг хөдөлгөм байхгүй байна гэж үү? Өнөөдөр ихэнх хууль зүйн фирмүүд веб сайт, албаны Facebook, Twitter, Linkedin хуудастай болсон учир тэндээс та дээр дурдсан мэдээллүүдийг олж авах бүрэн боломжтой юм.
АСУУГДАЖ БОЛОХ АСУУЛТАНД БЭЛТГЭ
Миний туршлагаас үзэхэд, KFC ч бай, шилдэг 10 хууль зүйн фирмийн нэг ч бай, тэд танаас адил төсөөтэй асуултуудыг асуух болно. Жишээ нь багаар ажиллах чадвар бий юу, ажлын ачаалаллыг хэрхэн зөв зохицуулах вэ, цагийг хэрхэн үр дүнтэй ашиглах вэ гэх мэт. Ажлын ярилцлагын үеэр хамгийн ихээр асуугддаг асуултуудын талаар та Гүүгл системээс хайж үзээрэй. Ингээд урьдчилаад бэлтгэсэн байхад та тэдэнд гоё сайхан сонсогдоод зогсохгүй илүү өөртөө итгэлтэй байх юм.ЗӨВ ХУВЦАСЛА
Орчин үед олон компани ажилчдаа чөлөөт байдлаар хувцаслаж болохыг нь зөвшөөрч байна. Гэвч хуулийн салбар өмнөх үеийн уламжлалыг хадгалсаар байгаа онцлогтой. Ярилцлаганд очихдоо та өөрт байгаа хамгийн сайн хослолыг өмссөн, гутлаа цэвэрлэсэн, үсээ цэвэрхэн засуулж, янзалсан байх ёстой – ер нь аль болох “мэргэжлийн” харагдах нь чухал шүү. Ямар ч хуулийн фирм үс нь сэгсийсэн, бохирдсон нэгнийг хөлслөхийг хүсэхгүй байх.ЯМАР Ч ЗҮЙЛД БЭЛЭН БАЙ
Намайг анх ажлын ярилцлаганд орохоор явах үед аав маань дараах үнэтэй зөвлөгөөг өгч билээ, “Ямар ч зүйлд бэлэн бай” гэж. Ажлын ярилцлагын дараа гээд урьдчилан ажил төлөвлөх хэрэггүй, ажлын ярилцлагаар танаас зөвхөн онолын мэдлэг шалгасан асуулт асууна гэж бүү бод. Ерөөсөө танд юу ч тохиолдож болно шүү, бэлтгэлтэй байгаарай гэсэн үг юм. Боломжит бүхий л детайлд бэлтгэ, эцэст нь гэж хэлэхэд, та хуулийн сургуулийн төгсөгч шүү дээ.МАРШРУТАА САЙТАР ТӨЛӨВЛӨ
Ажил олгогчийг бухимдуулдаг нэг зүйл бол ажил горилогч товлосон цагтаа ирэлгүй, 5 минут хоцрох явдал билээ. “Ажилд авах процессийн чухал үе шат болох ярилцлаганд цагтаа ирж чадахгүй юм бол ажил дээр гараад яах юм бэ” гэсэн сөрөг сэтгэгдэл төрүүлэх гээгүй л юм бол хоцорч болохгүй шүү. Иймд тэр фирмийн байршил хаана байна, ямар унаагаар, хэдэн минут зарцуулан байж явж очих вэ зэргийг заавал урьдчилан төлөвлөөрэй.ТӨГСГӨЛИЙН АСУУЛТАНД БЭЛТГЭ
Миний орж байсан ярилцлагууд үргэлж дараах байдалтай төгсдөг байлаа, “Танд биднээс асуух асуулт байна уу?”Энэ бол зөвлөгөөний хамгийн эхэнд дурдсан “судалгааны” ажлаа нөгөө талд тайлагнаж, өөрийгөө ямар ухаалаг, сониуч болохоо илэрхийлэх таатай мөч мөн, тийм үү? Мөн ажил олгогчид сонирхолтой санагдаж болох хэд хэдэн асуулт урьдчилаад бэлтгэсэн байх хэрэгтэй. Гэхдээ ухаалаг асуулт шүү.
ТАЙВАН БАЙ
Ажлын ярилцлаганд бэлтгэх болон орох нь таны хувьд стресстэй байх төдийгүй яг ямар ажлын байранд орохоор горилож буйгаас хамаараад өөр өчнөөн олон зүйлээс таны ярилцлага амжилттай болох үгүй нь хамаарна. Ярилцлаганд орохоос өмнө өөрийгөө тайвшруулж, амраах хэрэгтэй. Хэлэхээс хийх нь илүү хэцүү гэдгийг мэдэж байна л даа, гэхдээ л ядарсан, сандарсан байдал тань ажил олгогчид сайхан харагдахгүй л болов уу.Хуулийн фирмийн ярилцлаганд орохоос өмнө хийх 7 зүйл ингээд л боллоо, хэрэгцээтэй мэдээлэл байсан хэмээн найдаж байна.
Ярилцлаганд орох үедээ ямар ч тохиолдолд та зөвхөн өөрөөрөө байх хэрэгтэй гэдгийг санаарай. Мөн өөрийгөө дутуу үнэлэх хэрэггүй, бүр хэтэрхий дөвийлгөх ч хэрэггүй, чадахгүй зүйл дээр туршлагатай царайлах хэрэг ер байхгүй, хуурамч байдал бусдад ер нь их амархан танигддаг юм. Бас өөрийнхөө дотоод сэтгэл, зан чанарыг нуух, хаах хэрэггүй, ярилцлагын үеэр нээлттэй, чөлөөтэй байх хэрэгтэй. Нөгөө талаас та ч бас энэ ярилцлагын нэг тал буюу оролцогч тул, хэрэв сонирхож буй ажил тань сэтгэлд тань нийцэхгүй байвал заавал 1 үр дүнгийн хойноос зүтгээд байх шаардлага байхгүй байж болох юм. Эцсийн эцэст, бидний ярьж байгаа зүйл бол таны ирээдүйд л хамаарах юм шүү дээ, эцсийн шийдийг та өөрөө гаргах ёстой.
Эх сурвалж: The Student Lawyer
Зургийг ShutterStock