Энэхүү мэдээллийг бичиж буй зохиогч миний хувьд каннибализм буюу хүний мах, эд эрхтнийг идэж, хэрэглэх үзлийн талаар хаа нэг газраас багахан байдлаар уншиж, сонсож явсан ч түүнтэй холбоотой мэдээллийг бичих сонирхол ийнхүү бодитоор төрж байсангүй.
Германы хүнд рок хөгжмийн төрлийн Rammstein (Раммштайн) хамтлаг 2004 онд Mein Teil буюу “Миний биеийн хэсэг” гэх дууг гаргаж байжээ. Миний сонсох дуртай хамтлаг л даа. Харин тэрхүү бүтээлийг нь сонсож байгаад өнөөдөр санамсаргүй байдлаар түүхийг нь олж мэдэв.
“Сонирхолтой” юм гээч. Нөхдүүд бүр бодит түүхээс санааг нь авч бичсэн байх юм. Дууных нь үгийг орчуулбал, “Өнөөдөр би нэг залуутай уулзах гэж байгаа, Тэр намайг бүр идэх нь холгүй байдлаар таалдаг, Тавган дээр миний биеийн зөөлөн, хатуу хэсгүүд, Учир нь чи бол иддэг зүйлийнхээ үр дүн нь, Энэ бол миний биеийн хэсэг – Үгүй, миний биеийн хэсэг – Үгүй…” гээд л үргэлжилнэ.
Хэргийн гол баатар бол Германы иргэн, гэмт этгээд Армин Майвас (Armin Meiwes) юм. Мань хүн тэртээ 2001 онд интернэтэд байрлах The Cannibal Cafe гэх веб сайтад “18-30 насны, эрүүл саруул бөгөөд сайн дураараа алуулж үхэх сонирхолтой хэн нэгнийг хайж байна” гэсэн утгатай зар оруулжээ. Энэхүү зарын дагуу олон хүн түүнтэй холбогдож байсан ч бүгд асуудалд тийм ч нухацтай хандахгүй байв. Армин ч тэднийг ямар нэг байдлаар албадаж байсангүй. Гэтэл энэхүү ер бусын саналд өөрийн хүсэлтийг бодитоор илэрхийлсэн нэгэн этгээд гарч ирсэн нь Bernd Jurgen Armando Brandes буюу Брендэс гэх 43 настай инженер залуу байлаа. Тэрээр 2001 оны 3 сарын 9-нд Берлинээс Армины оршин суудаг Ротенбург гэх жижиг тосгонд очжээ. Гол зорилго бол ойлгомжтой, Брендэс үхэхийг хүссэн, Армин түүнийг хүсэлтийг биелүүлнэ.
Сонирхолтой нь тэр хоёрын хийж байсан бүх үйл явдал видео бичлэгт хадгалагдан үлдсэн байдаг байна. Тэр өдрийн орой талууд Армины гэрт уулзалдаж, гол ажлаа хэрхэн гүйцэтгэх талаар өөр хоорондоо ярилцсан байна. Эхлээд Брендэс Арминаас түүний бэлэг эрхтнийг амаараа тасдаж авахыг шаардсан. Гэтэл энэхүү оролдлого нь тэрхүү үйлдлийг бүрэн гүйцэтгэхэд тохиромжгүй байсан тул Армин, Брендэсийн зөвшөөрлөөр хурц иртэй хутга ашиглаж, эрхтнийг нь тайраад идэхийг оролдсон байна. Хоёулаа хувааж идэх гэсэн хэрэг л дээ. Түүхийгээр нь идэхийг оролдоод зогсохгүй бүр, гал дээр амталж шарсан гэдэг. Эх видео бичлэгийг үзсэн шүүхийн ажилтнуудын дүрсэлснээр Брендэс үр дүнд нь маш ихээр цус алдаж, ухаан нь балартаж, шоконд орсон байжээ. Энэ хугацаанд Армин түүнд их хэмжээний архи, өвчин намдаах эм өгч байсан ч Брендэс төд удалгүй цус алдаж, нас барав. Цогцос ийнхүү Армины мэдэлд очсон тул мань хүн төлөвлөсөн ёсоор биеийг хэсэгчлэн хувааж, хөлдөөгөөд 10 гаран сар хүнсэндээ хэрэглэжээ. Бүр ясыг нь хүртэл нунтаглаад гурилаар орлуулах гэж оролдсон гэдэг. Үнэхээр аймшигтай.
2002 оны 12 сард Армин дахин шинэ зар гаргаж тавьсан бөгөөд түүнийг нь харсан нэгэн коллежийн оюутан энэ тухай цагдаад мэдэгдсэнээр хууль сахиулагчид Армин Майвасын талаарх мэдээллийг олж тодорхойлон, гэрт нь гэнэтийн нэгжлэг хийснээр хүний биеийн хэсэг, мөн аллага гүйцэтгэж буй видео хуурцаг зэргийг олсон байна. Баригдах хүртлээ Армин зарын дагуу 5 хүнтэй уулзаж байсан баримт гарч ирсэн ч тэднийг алаагүй байна. Тэрээр Брендэсийн хэргээр цагдаад өгсөн мэдүүлэгтээ, “Түүний махыг идэх бүрт надад үлдсэн түүний тухай дурсамж улам тодордог байлаа. Яг л гахайн мах шиг амтагддаг байсан” гэж хэлж байв. 2004 оны 1-р сард Армин Майвас хүндрүүлэх нөхцөл байдалгүйгээр бусдыг алсан хэрэгт буруутгагдан, 8 жилийг шоронд өнгөрүүлэх ял авчээ. Үүнд мэдээж тухайн гэмт хэргийг үйлдсэн этгээдийн шууд санаа бодол, сэтгэцийн эрүүл мэндийн байдал, бас хохирогчийн зүгээс хийсэн буруутай үйлдэл зэргийг харгалзан Армины өмгөөлөгч ялын тогтоолд нөлөөлсөн байх учиртай юм. Шүүхийн шийдвэр ч тухайн үедээ мэдээж хэвлэл мэдээллийн анхаарлыг маш ихээр татаж байсан нь лавтай. 2005 оны 4-р сард Прокурорын газраас анхан шатны шүүхийн шийдвэрийг давж заалдсанаар Армин бусдыг шунахайн сэдэлтээр алсан гэмт хэрэгт буруутгагдан, насаараа хоригдох ял авчээ.
Армин Майвас яагаад ийм хэрэг хийх болов? Шалтгаан бий юу? Тэрээр хөрш айлуудын зүлэг ногоог нь тэгшлээд өгчихдөг, машин тэргийг нь засварлаад өгчихдөг, заримдаа тэднийг гэртээ оройн хоолонд урьчихдаг учир 42 настай, компьютерийн шинжээч залуу хэрэг илчлэгдэх өдрийг хүртэл хөршүүддээ үнэхээр “сайн хөрш” гэж харагдахаар байсан нь ойлгомжтой. Түүний амьдралыг харвал, Армин багадаа ихэд ганцаарддаг байв. Учир нь түүнийг бага байхад 2 ахынх нь нэг нь сүмийн санваартан болоод Берлинрүү явсан, нөгөө нь гэрээсээ тусдаа гараад явсан, аав нь ч ээжээс нь салаад явчихсан байжээ. Ээж нь нийтдээ 3 удаа гэрлэж байсан ч гэрчүүдийн хэлж байснаар түүний ихэмсэг, дээрэнгүй зан ааш салалтанд ихээр нөлөөлж байсан байх магадлалтай гэдэг. Мөн орой 10 цаг гэхэд орондоо заавал орсон байх ёстой гэсэн шаардлагыг тавьдаг байсан талаар Армин хожим дурсаж байв. Мөн цааш үргэлжлүүлэхдээ, “1970 оны эхээр миний үеийн хүүхдүүд бүгд жинсэн өмд өмсөж байхад, ээж намайг хуучны уламжлалт мөрөвчтэй шоорт өмсөхийг шаарддаг байв” гэж хэлсэн байна. Тэрээр ээжтэйгээ хоёулхнаа том байшинд өссөн тул түүнээс нууцаар олон зүйл хийж үздэг, хадгалдаг байжээ. Жишээ нь, Фритз Харманн (Fritz Haarmann) гэх 1920-иод оны үед 26 залууг хөнөөж, тэдний цусыг нь уудаг байсан, эцэст нь цаазлагдсан Германы цуврал алуурчны тухай материалуудыг цуглуулж, уншдаг байв. Цаашлаад барби хүүхэлдэй худалдаж аваад, мөч мөчөөр нь салгачихдаг байсан байна. Тэрээр мөн ижил хүйстний бэлгийн амьдралыг ихэд сонирхдог байв.
Армин ээжийгээ хүнд өвчний улмаас нас барсны дараагаас өөрийн толгойд эргэлддэг байсан элдэв ер бусын уран сэтгэмжийг бодит болгох ажилд хараат бусаар, бие даан оролцох болжээ.
Хохирогч Брендэсийн хувьд гэр бүлийн амьдрал нь мөн л тогтворгүй байсан тэрээр найз бүсгүйгээсээ салаад ижил хүйстнээ сонирхох болсон байна. Шүүх хурлын үеэр прокурор түүний талаар хэлэхдээ, “Тэрээр өөрийгөө егүүтгэхийг маш ихээр хүсдэг сэтгэцийн өөрчлөлтөөс гаралтай өвчнөөр шаналж байсан” тухай илтгэж байжээ.
Армин Майвас өөрийн түүхээр ном бичихийг хүсдэг бөгөөд гол нь түүний үйлдлийг давтаж болзошгүй хүмүүсийг гэмт хэрэг үйлдүүлэхгүй байхад чиглэсэн зорилгоор гэнэ. 2007 онд өдөр тутмын Bild сонинд нийтлэгдсэн 2 каннибал залуугийн талаар нийтлэлд зөвлөхөөр ажилласан байна. Мөн шоронд байх хугацаандаа тэрээр цагаан хоолтон болжээ. Түүний тооцоолж буйгаар Германд өдгөө 800 орчим каннибал амьдарч байгаа гэнэ.
Армин Майвас буюу Ротенбургийн каннибалын гэмт хэргийн талаар бичигдсэн ном, зохиол, хөгжим, кино нь арилжааны зах зээлд тодорхой хэмжээгээр нийлүүлэгдсэн байдаг.
Эх сурвалж: Wikipedia, The Guardian, Evening Standart
Comments