Хувь хүний хөгжил, хэрхэн бизнес эхлүүлэх вэ сэдэвт ном зохиол олон боловч товч бөгөөд тодорхой, мөн ойлгомжтой, уншигчийн сонирхолыг татсан нь төсөөлж байснаас цөөхөн. Дээр нь чанар муутай орчуулгын бүтээл бол үнэ цэнгүй болсон байх нь бий. Тэгвэл энэхүү review буюу дүгнэлтийг бичиж буй уншигч миний зүгээс ирээдүйн гарааны бизнес эрхлэгчид, энтерпрюнер залууст Питер Тийл, Блэйк Мастерс нарын бичсэн “Тэгээс Нэгрүү” номыг заавал уншихыг зөвлөх байна. Нью Йорк Таймсын бестселлэр “Хар хун” номын зохиогч Нассим Николас Талебийн зөвлөснөөр “Эрсдэл үүрдэг хүн бичсэн тул энэ номыг заавал унш. Зохиогч нь Питер Тийл учраас хоёр удаа нягталж унш. Олж мэдсэнээ баталгаажуулахын тулд гуравдахиа унш. Энэ бол сонгодог бүтээл” гэсэн нь “Ээ дээ” гэмээр.
Тэгэхээр номын нэр бол “Тэгээс Нэгрүү”. Ухаандаа, хэн хүний анзаараагүй, тоогоогүй зах зээлээс шинэ, ер бусын бүтээгдэхүүн, үйлчилгээг гаргах гэсэн далд утгыг илэрхийлж байна.
Энэхүү номыг унших явцад ерөөсөө ганц түлхүүр үг гараад байсан нь ТЕХНОЛОГИ юм. Гэхдээ энэ үгийг зөвхөн компьютер, техник хэрэгсэлтэй холбож ойлгох хэрэггүй юм шүү. Яахав, танд тэгж санагдаад байгаа бол хялбаршуулаад, НУУЦ ЖОР гэе.
Орчин үеийн оюун ухаант хүн бий болсноос хойш өдийг хүртэлх хугацаанд тэд хамтран амьдарч, ан агнуураас эхлээд мал аж ахуй, хөдөө аж ахуй, санхүү эдийн засаг, харилцаа холбоог хөгжүүлж, аж үйлдвэржилтийн үеийг даван туулж ирсэн. Ер нь аж үйлдвэрийн хувьсгал гэх үйл явдлаас хойш хүн төрөлхтний нийгмийн амьдрал, зохион байгуулалтад асар их өөрчлөлт орж, цаг хугацааны хэмнэл өмнөхөөсөө илүү хурдтай болсон мэт санагдах болсон юм уу даа. Энэхүү дэвшилд мэдээж технологи чухал үүрэг гүйцэтгэсэн. Өөрөөр хэлбэл, амжилттай бизнес, компанийн нууц нь өөрөө технологи байдаг тухай тус номыг зохиогч бичсэн байна.
Өнөөдөр хамгийн их технологийг өөрийн болгосон улсыг нэрлэ гэвэл би Америкийн Нэгдсэн Улс гэнэ. Тийм ч учраас тэд дэлхийн зах зээлд хүчтэй байр суурийг тусгаар тогтносон цагаасаа хойш эзэлсээр байгаа. Яг үүнтэй адилхан, хэрвээ танай старт-ап өөрсдийн нууц жор бүхий технологийг хөгжүүлж, аль болох өрсөлдөөн багатай зах зээлд хүч сорьвол ирээдүйд тэрбумаар үнэлэгдэх МОНОПОЛЬ компани болж чадах тухай өгүүлсэн. Зах зээлд монополь байх нь буруу биш үү гэж үү? Үгүй шүү, харин ч эсрэгээрээ маш их давуу тал, үнэ цэнтэй юм, амжилттай бизнесийг төрүүлэх үндсэн нөхцөл нь болдог хэмээн зохиогч бүр 3 бүлэг дамнуулан бичсэн харагдсан.
Сүүлийн үед залуусын дунд тодорхойгүй, гутранги үзэл санаа сэргэж эхэлсэн нь тэдний хичээнгүй зүтгэлээр хүрч болох зүйлсийг өмнөх үеийнхэн нь аль эрт шийдээд, юу ч үлдээгээгүй тухай энэхүү номонд гарч байсан. Үлдсэн 2 боломж байгаа нь Гар сунгах төдийд хүрч болох амар хялбар зүйл эсвэл Хамаг байдгаараа зүтгээд ч хүрч үл чадах, биелэшгүй зүйл ажээ.
Тэгвэл шинэ технологи, шинэ санаа өнөөдөр хаанаас хамгийн ихээр ундарч болох вэ? гэсэн асуултанд Аль болох цөөн хүнээс бүрдсэн, цаашид тэрхүү багаараа хийж бүтээнэ гэсэн зарчимтай, интернэтэд суурилсан старт-ап бизнес гэсэн байх юм. Мэдээж хэрэг, одон орон судлал, биотехнологи, анагаах ухааны салбарт ирээдүй бий, судлах зүйл асар их байгаа ч старт-ап, хөрөнгө оруулагч аль аль нь үүнд тийм ч их итгэл, найдвар тавьдаггүй бололтой.
Шинээр бизнес босгож байгаа нөхдөд төлөвлөгөөт зорилт, ур чадвар, баг хамт олон, технологи байх хэрэгтэй ч түүнийгээ амжилтанд хүргэхэд Аз чухал нөлөөтэй байдаг уу гэсэн асуултанд бизнесмэнүүд янз бүрийн хариулт өгдөг байна. Зарим нь Амжилт-Аз завшаан 2 нь хоорондоо салшгүй холбоотой гэсэн бол зарим нь амжилтыг цэвэр хичээл зүтгэлтэй холбож байна. Дэлгэрэнгүйг ТА СУГАЛАА БИШ бүлгээс олж уншаарай.
За тэгээд цаашилбал, хамтрагчаа хэрхэн сонгох вэ, компанийхаа суурийг хэрхэн тавих вэ, компанийн бүтэц зохион байгуулалтыг хэрхэн хийх вэ, бүтээгдэхүүн, үйлчилгээгээ хэрхэн борлуулах вэ, энтерпрюнер хүн цаанаасаа төрдөг үү, ямар шинж чанартай байдаг вэ гээд олон асуултын хариуг та тус номноос олж авах боломжтой. Миний хувьд гарааны бизнес эрхлэхийг төлөвлөж байгаа, зорилготой улсуудад дажгүй хөөрхөн гарын авлага болчих ном байна хэмээн дүгнэсэн. Тус бүтээлийг Монголд iSquarePublishing гэх компани хэвлэсэн байх бөгөөд үнийн хувьд 26,000.00₮-өөр худалдаалагдаж байв.
Төгсгөлийн оронд: Питер Тийл танаас ийнхүү асууна. “Хуруу дарам цөөн хүн санал нийлдэг чин үнэн зүйл юу вэ?”
Тэгвэл хариулт нь: “Олон хүн даяаршлыг дэлхийн ирээдүй гэж хардаг ч үнэн хэрэгтээ технологи л бидний ирээдүйг тодорхойлдог” ажээ.
Зургийг BrandHome.com
Comments