Гиннесийн амжилт бол зөвхөн урт үстэй, урт хумстай хүмүүсийн жагсаалт биш билээ. Та дэлхийн хамгийн хөгшин настай шүүгч хэн болох, шүүхээс тогтоосон хамгийн урт хугацааны хорих ял хэдэн жил болох, эсвэл хамгийн богино хугацаанд үргэлжилсэн шүүхийн хэлэлцүүлэг хэзээ, хаана болж байсан талаар өмнө нь эргэцүүлж байв уу? Үгүй бол үргэлжлүүлээд уншина уу.
Их Британийн өмгөөлөгч Roy Mervin Palmer 2011 онд хамгийн олон жил өмгөөлөгчөөр ажилласнаар Гиннесийн рекорд тогтоож байжээ. Энэ нь 54 жил юм байна. Тэрээр 1956 оны 11-р сараас анх мэргэжлээрээ ажиллаж эхэлжээ.
Саяхны жишээ. АНУ-ын холбооны шүүгчээр ажиллаж байсан шүүгч Wesley E. Brown нь 104 нас хүртлээ мэргэжлээрээ ажиллаж байв. Тэгвэл үүнтэй адил төрлийн албан ёсны Гиннесийн рекордыг АНУ-ын Миссури мужийн шүүгч Albert R. Alexander эзэмшдэг байна. Тэрээр 1926 онд харьяа мужийн Баарын холбоонд элсээд, 1965 оныг хүртэл буюу 105 нас 8 сар хүртлээ шүүгчээр ажилласан байна. Тэгвэл нөгөө талаас хамгийн залуу шүүгчийн рекордыг Пакистаны иргэний хэргийн шүүхийн шүүгч Muhammad Ilyas эзэмшиж байна. Тэр 20 настайдаа Пакистаны 2 дахь том хот болох Лахори хотын иргэний шүүхийн шүүгчийн сонгон шалгаруулалтанд тэнцэж, 9 сарын дараагаар шүүгчээр албан ёсоор томилогдож байв.
Хамгийн урт хугацааны хорих ял. 1994 онд АНУ-ын Оклахома хотод болсон Charles Scott Robinson-д холбогдох шүүх хурлаар түүнийг бэлгийн хүчирхийллийн 6 тооны нийлмэл гэмт хэрэг үйлдсэн хэмээн иргэдийн төлөөлөгчдөөс үзэж, үйлдсэн гэмт хэрэг тус бүрт нь 5000 жил хорих ялын дүгнэлт гаргасан байна. Шүүх хуралдааныг даргалагч шүүгч дүгнэлтийг хүлээн зөвшөөрснөөр Робинсон нийтдээ 30000 жил хоригдох ял авчээ. Робинсон өнөөдөр ч гэсэн хорих ялаа эдэлсээр байна.
Түүхэнд тэмдэглэгдэн үлдсэн бас нэг сонирхолтой зүйл бол шүүхээс амьтанд оноосон ял юм. 1266 онд нэгэн гахайг хүүхэд идсэн хэргээр шүүж, шийтгэлд нь түүнийг амьдаар нь шатааж алсан тохиолдол Франц улсад гарч байжээ.
Шүүхэд хэрэг хянан шийдвэрлэх процесс үргэлж удаан явагддаггүйг илэрхийлсэн явдал 2004 онд Шинэ Зеландын Greymouth дүүргийн шүүхэд болсон юм. Nicholas Clive McAllister нь хар тамхи хадгалсан хэрэгт буруугүй гэх шийдвэрийг иргэдийн төлөөлөгчид 1 минутын дотор хэлэлцээд гаргаж байжээ.
Швейцарь улс зөвхөн гоё сайхан байгаль, шоколадны цуглуулга, эсвэл цэргийн хутганы хийцээрээ алдартай биш юм. Тус улс 2010 онд авто зам дээр хурд хэтрүүлсний торгуулийг дэлхий дээр хамгийн өндрөөр тогтоож байв. Учир нь нэгэн азгүй жолооч 80 км цагийн хурдтай явах зам дээр 137 км цагийн хурдтай давхижээ. Үр дүнд нь түүнийг шүүхээс 290 мянган доллараар торгосон байна.
1993 онд Wall Street Journal сэтгүүл Хюстон хотын нэгэн брокерийн компанийн талаар нийтлэл хэвлэсэн нь тус фирмийн нэр хүнд, цаашдын оршин тогтнолд богино хугацаанд сөргөөр нөлөөлж, улмаар дампуурахад хүргэсэн байна. АНУ-ын шүүх WSJ сэтгүүлийн редакцийг MMAR Group Inc. компанийн тухай худал мэдээлэл тарааж, гүжирдсэн хэрэгт буруутган, 1997 онд 222.7 сая доллараар торгох шийдвэр гаргаж байв.
2002 онд Грекийн парламентаас хууль бус мөрийтэй тоглоомыг хязгаарлахын тулд нэгэн хуулийг баталсан нь дотроо бүх компьютер тоглоомыг хориглосон байв. Мэдээж энэ нь олны эсэргүүцэлтэй тулгарсан учир, хууль батлагдсанаас 2 сар хүрэхгүй хугацааны дотор нэмэлт өөрчлөлт оруулж, зөвхөн мөнгө, санхүүтэй холбогдох тоглоомыг хязгаарласан байна.
Техас мужийн шүүхийн мэргэшсэн сэтгүүлч Mark Kislingbury нь АНУ-ын Үндэсний Шүүхийн Мэргэшсэн Сэтгүүлчдийн Холбооны нэгэн рекордыг 2004 оноос хойш эзэмшсээр байна. Тэрээр минутанд 360 үгийг 97.23%-ийн алдаагүй зөв бичиж, шүүх хуралдаанд оролцогчдод хүргэж байсан хэмээн тэмдэглэгдсэн.
Хамгийн удаан үргэлжилж буй иргэний хэрэг. Энэ бол АНУ-д анх 1972 онд үүсгэгдсэн Мартин болон Сэймплийн хэрэг юм. Тухайн үед Жэймс Мартин Вьетнамын дайнд оролцохоор 3 өдрийн турш үргэлжлэх цэргийн урьдчилсан шатны үзлэгт орсон боловч төд удалгүй эрүүл мэндийн байдал нь дордож, дайнд явах аргагүй болсон байна. Энэ нь тухайн үед АНУ-ын цэрэг татлагийн комисст ажиллаж байсан эмч ажилтнуудын буруутай үйл ажиллагаатай холбоотой ажээ.
Эх сурвалж: Kat, Survivelaw.com
Comments