Мэдээллийн технологийн IBM корпорацийн хөгжүүлсэн Watson компьютерийн технологи дээр суурилсан ROSS гэх Хиймэл оюун ухаант хуульчийг АНУ-ын BakerHostetler хуулийн фирм өөрийн бүтцэд байх, өдгөө 50 хуульчтай Дампуурлын эрх зүйн хэлтэст авч ажиллуулахаар болсон байна. ROSS компьютерийн гүйцэтгэх ажлын үүрэг хуулийн сургуулийн шинэхэн төгсөгчтэй дүйцэх авч үр дүн нь түүнээс хэд дахин илүү байх ажээ. (Watson нөхрийн талаар энд дарж дэлгэрэнгүй мэдээлэл авна уу)
“ROSS бол зөвхөн судалгааны зориулалттай бөгөөд хуульчдын ажлын бүтээмжийг нэмэгдүүлэхэд чиглэсэн хэрэгсэл” болох тухай тус фирмийн ахлах мэдээллийн ажилтан тайлбарлаж байна. Тэгвэл тус хэрэгслийн давуутай тал нь ROSS хүний хэл ойлгох ба таны асуусан асуултыг интернэт, мөн өөрт байх терабайтаар хэмжигдэх мэдээллийн сангаас шүүж, боловсруулан, хамгийн богино хугацаанд, хамгийн зохистой хариултыг баримт, тайлбарын хамт гаргаж өгөх юм. Мөн батлагдсан шинэ хууль, дүрэм, журам, шүүхээс гаргасан аливаа тогтоол, шийдвэрт мониторинг хийж байх тул таны хариуцсан хавтаст хэрэгт хамаатай, нөлөөлж болох нөлөөллийн талаар таамаг мэдээлэл өгч чадна гэх.
Хуулийн технологийн чиглэлээр дагнан судалгаа хийдэг профессор Райн Калугийн бодлоор ROSS болон түүнтэй адил төрлийн робот хуульчид АНУ-ын фирмүүдэд ашиглагдаж эхлэх нь тун ойрхон байна. Тэрээр өгүүлэхдээ,
“Хуулийн практикт уламжлалт програм хангамжийг ашиглах нь хуучин үзэгдэл болсон. Watson бол хууль зүй, анагаах ухааны салбарын мэргэжилтнүүдэд аливаа эцсийн шийдийг гаргахад чухал нөлөөтэй хэрэгсэл болж байна. Эцэст нь хэлэхэд, ирээдүйд шинэ технологи ашиглахгүй байх нь нэхэмжлэл бичихдээ хуучны бичгийн машин ашиглаж буй мэт таныг хуучинсаг, бас хариуцлагагүй харагдуулах болно” хэмээжээ.
Үүний баталгаа болсон мэт Ross Intelligence компанийн гүйцэтгэх захирал Андрью Арруда, “BakerHostetler фирмээс гадна бусад хуулийг фирмүүд ч тус технологийг ашиглах гэрээг аль хэдийн байгуулсан байгаа. Бидний зорилго бол ROSS-ийг хуулийн асуудал эрхэлсэн бүлэг хүмүүс, компани бүрт гишүүнээр элсүүлэх явдал юм” хэмээн яриандаа дурджээ.
Сүүлийн жилүүдэд хуульч, хуулийн фирмийн үйл ажиллагаанд туслалцаа үзүүлэх зорилготой өгөгдөл боловсруулах технологи, хуулийн албан бичиг боловсруулах технологи дээр суурилсан автомат бот бүхий технологийн гарааны бизнесүүдийн тоо нэмэгдсэн. Жишээ нь LexMachina буюу шүүхийн шийдвэрүүд дээр анализ хийсний үндсэн дээр тухайн нэг хэргийг шүүх хэрхэн шийдвэрлэхийг таамаглах програм хангамж, CaseText буюу төрийн байгууллагаас нийтэлсэн олон мянган баримтуудад анализ хийдэг програм хангамж, 18 настай Британи хүүгийн зохиосон DoNotPay буюу торгуулийн хуудас авсан жолооч нарт хуулийн зөвлөгөө өгдөг, автомат ботоор цэнэглэгдсэн веб сайт гэх мэт.
Дээрх мэдээллүүд нь сайн хуульчийн туслалцаа хүссэн хэн нэгэнд таатай мэдээ байж болох ч нөгөө талаар роботууд хүмүүсийн ажлын байрыг булааж эхэллээ гэх сөрөг хандлага дагаж байна. Түүхэн талаас нь авч үзвэл, хэдий технологи хөгжиж ирсэн ч ажлын байрны тоо ялгаагүй нэмэгдсээр ирсэн, гэвч хиймэл оюун ухаан хэмээх тэс өөр ойлголт энэхүү айдсыг бодит болгох эсэх нь цаг хугацааны асуудал болоод байна.
Эх сурвалж: Washington Post, Fortune
Comments