Аливаа кино зохиолын тойм бичвэрт үйл явдлын дэлгэрэнгүй дүрслэгдсэн байгаа тул хэрэв та урьдчилсан мэдээлэл авахыг хүсэхгүй байгаа бол цааш үргэлжлүүлэн уншихгүй байна уу.
Хуулийн оюутнуудын заавал үзэх ёстой кино гэсэн аливаа жагсаалт дунд “Хуулийн фирм” (The Firm) нэртэй кино байнга харагддаг юм. Өнгийгөөд үзвэл, тус кинонд өнөөдөр бидний зүс таних хэд хэдэн алдартай жүжигчид дүр бүтээжээ. Энэхүү кино нь Жон Гришамын (John Grisham) 1991 онд хэвлүүлсэн The Firm гэх зохиолоос сэдэвлэгдсэн байна. Жон өөрөө хуульч мэргэжилтэй бөгөөд 1984 онд болсон 12 настай охины хүчингийн хэрэг, хэргийн шүүх хурлын үйл явц түүний сонирхолыг татаж, түүнээс уран зохиол бичих гэсэн анхны сэдлийг олж авсан гэдэг. Үр дүнд нь “Time to Kill” гэх зохиол нь 3 жилийн дараа хэвлэгдэж байжээ. Энэхүү зохиолоор 1996 онд Жойл Шумахер гэх найруулагч кино бүтээж байв. Энэ мэтээр түүний нэлээн олон зохиол нь кино уран бүтээл болсон байдаг байна.
“Хуулийн фирм” киноны үйл явдал. Митч Макдийр бол Харвардын хуулийн сургуулийг төгсч буй нэлээн амбицтай, чадалтай оюутнуудын нэг юм. Бас сургуулийнхаа Топ 5 оюутны нэг гэж байгаа. Түүнийг ажилд авахаар Америкийн өнцөг булан бүрээс том жижиг олон хуулийн фирмүүд санал тавьж эхэлдэг.
Хэрэв танд жилийн 6 оронтой тоогоор хэмжигдэх долларын цалин, бага хүүтэй үл хөдлөх хөрөнгийн зээл, VIP үйл ажиллагааны гишүүнчлэл, сонгодог Мерседес Бенц санал болговол яах вэ? Хуульчийн гэрчилгээ аваагүй, шинэ төгсөгчид шүү дээ? Митч ч энэхүү саналыг дуртай нь аргагүй хүлээж аваад, удалгүй эхнэртэйгээ тус хуулийн фирм байрлах Мемпис (Memphis) хотод, шинэ хаусанд нүүж ирнэ. Тансаглал, хүлээн авалт ч хэдэн өдөр үргэлжлэв. Ийнхүү ажлын өдөр эхэллээ.
Бендини, Ламберт энд Локк (Bendini, Lambert & Locke) бол ажилчдын орон тоо бага, татварын хуулиар мэргэшсэн, үйл ажиллагааны цар хүрээ нь “харьцангуй том” шинжтэй, нэр хүндтэй хуулийн фирм юм. Товчхондоо, мөнгөтэй хүмүүсийн хөрөнгийг татварын дарамтаас аль болох холдуулах элдэв боломжит нөхцлийг бүрдүүлэхийн төлөө ажилладаг хуулийн фирм гэж хэлж болох юм.
Фирмийн хүмүүс Митчийг шалгах гэсэн үү яасан, юун түрүүнд Баарын шалгалтанд орж тэнцэхийг түүнд даалгаад, хажуугаар нь олон төрлийн хавтаст хэргийг богино хугацаанд шалгаж, дүгнэсэн байхыг шаарддаг. Нэг өдөр Митч, түүний ажилладаг фирмийн 2 хуульч Кайманы арал дээр амарч, зугаалж яваад дэлбэрэлтэнд өртөж, алагдсан байхыг олж сонсоно. Магадгүй санамсаргүй хэрэг явдал байсан байж болох. Үүнээс хойш хэдэн өдрийн дараа Митч, Холбооны мөрдөх товчооны хараан дор орсон байна. Шалтгаан нь Хууль зүйн яамны бие төлөөлөгчийн хэлснээр, Бендини, Ламберт энд Локк (БЛэЛ) фирм бол Чикагогийн мафийн бүлэг болох Моролтогийн ахан дүүсийн хууль зүйн асуудлыг хариуцсан байгууллага бөгөөд үүнийг мэдээд, фирмээс гарах гэсэн дөрвөн ч хуульч хэдхэн жилийн дотор алагдсан гэдгийг хэлдэг. Тиймээс мафийн бүлгэм болоод БЛэЛ-ийг татан буулгаж, шалгах үндэслэл болох аливаа нотлох баримт, гэрээ хэлцэл, банкны шилжүүлэг тус бүрийн хуулбарыг нууцаар авчирч өгөх үүргийг түүнд хариуцуулах гэнэ.
Митч хоёрдмол байдалд оров.
Учир нь хэрэв тэрээр цагдаа нарын талд ажиллаад, компанийн бүх баримтыг шилжүүлбэл, зарим хууль ёсны үйлчлүүлэгчдийн нууц задарч, энэ зөрчил нь цаашид түүнийг мэргэжлээрээ ажиллаж чадахгүйд хүргэх эрсдэлтэй байв. Нөгөө талаар, фирмийн энэхүү байдлыг хүлээн зөвшөөрөөд, хэн нэгний хяналтанд ажиллах гэвэл хэзээ нэг өдөр Холбооны мөрдөх товчоо тус фирмд нэвтэрснээр Митч үлдсэн амьдралаа шоронд өнгөрөөх эрсдэлтэй байв. Энэ хооронд мэдээж олон сонирхолтой үйл явдал өрнөж байгаа.
Манай хүн ч гүйлгээ ухаантай гэж жигтэйхэн. Тэрээр фирмийн ажилчид үйлчлүүлэгчдээс илүү төлбөр суутгадаг болохыг мэдэж авдаг. Жишээ нь тухайн нэг үйлчлүүлэгчийн кэйсийг шийдвэрлэхэд зарцуулсан хуульчийн бодит цаг дээр яагаад ч юм 30 минутаас хэдэн арван цаг үл мэдэгдэх шалтгаанаар нэмэгдэж, төлбөрийн нэхэмжлэл дээр бичигдсэн байдаг байв. Энэ нь мэдээж холбооны гэмт хэрэгт тооцогдож байлаа. Фирмийг буруутгах бас нэг үндэслэл гэсэн үг. Тиймээс тэрээр Холбооны мөрдөх товчооныхонд фирмийн ажилчдыг зөвхөн энэхүү үндэслэлээр буруутгахад тустай баримт бичгүүдийг хуулбарлаж өгөөд, мэдээллийг хууртагдсан үйлчлүүлэгчдэд илгээснээр фирмийн хувь заяаг шийдэх төлөвлөгөө боловсруулна. Хажуугаар нь бас олон зүйл болж өнгөрдөг!
Хууль бус үйл ажиллагааг нь хууль зүйн хүрээнд шийдвэрлэдэг байгууллагыг нь дампууруулах шахсан нөхрийг Моролтогийн ахан дүүс зүгээр өнгөрөөхгүй нь ойлгомжтой, учир нь цаашид Холбооны мөрдөх товчооныхон фирмээс юу олж мэдэж болохыг таашгүй. Сонирхолтой нь киноны төгсгөлд манай хүн өнөөх мафиуд дээр өөрөө очоод үнэн учраа тайлбарладаг. “Манай фирм үнэхээр хариуцлагагүй, зүй бусаар өдөр тутмын үйл ажиллагаагаа явуулдаг байжээ, намайг анх тус фирмд ороход хэн ч энэ зүйлийн талаар дурдаж байсангүй, энэ бол буруу үйлдэл, тиймээс би цааш нь мэдэгдэх хэрэгтэй байсан юм, Холбооны мөрдөх товчоотой хамтран ажилласан явдал нь фирмийн үйлчилгээний хөлсөнд үйлчлүүлэгчдээс илүү төлбөр тооцдог байсан залилангийн шинжтэй үйлдлийг л илчлэх зорилготой, хэрэв та бүхэн тэрхүү хохирлоо нэхэмжлэх хүсэлтээ бичгээр гаргаад өгвөл би бусад үйлчлүүлэгчийн гаргасан хүсэлтийн адил, эрх ашгийн тань төлөө ажиллахад бэлэн байна, ингэхдээ мэдээж тухайн үйлчлүүлэгчийн эрх ашгийг хөндөх бусад мэдээллийг нь задруулахгүй байх үүрэг, тангаргыг би хуулийн өмнө, мөн өөрөө өөртөө хүлээсэн байгаа, би та нарын бүх үйлдлийг мэднэ, нотлох баримтуудыг нь ч өөртөө хуулбарлаж авсан байгаа, магадгүй ингэх нь намайг та бүхэнтэй илүү шударгаар ярилцахад тус дөхөм болно гэж итгэсэн юм, өөрөөр хэлбэл, намайг амьд сэрүүн байгаа цагт тэрхүү мэдээлэл тань дээр дурдсан хуульч, түүний үйлчлүүлэгч хоорондын нууцад хамаарч, түүнийг нь би задруулахгүй байх үүргийг хүлээнэ” гэдэг.
Митч ингэснээр ямар ч хуулийг зөрчөөгүй юм. Бас өөрийгөө мафиудаас хамгаалах нөхцлийг хэд хэдэн хүмүүсийн тусламжтай бүрдүүлсэн. Холбооны мөрдөх товчооноос өөрт нь анх даалгаснаар фирмийн ажилтнуудыг шалгах үндэслэлийг бага ч атугай гаргаж өгсөн, мөн бусад үйлчлүүлэгчдийн нууцыг энэ үйл ажиллагаандаа ашиглаж, задруулаагүй учир хуульчийн эрхээ цаашид хадгалах боломжтой болж байгаа юм.
Тус кино нь Оскарын шагналд 2 төрлөөр нэр дэвшиж байсан байна. Миний хувьд киноны эхлэл болон дунд хэсэг нэлээн сэтгэл догдлуулсан, бас айдас төрүүлсэн хэсэг байлаа. Хуулийн оюутнуудын хувьд энэ киног үзсэнээр юуг олж авч болох вэ гэж үү? Магадгүй мэргэжлээрээ ажиллахдаа хуульчийн үнэт зүйл, ёс зүйг өнгө мөнгөнөөс үл хамааран, хэзээд баримталж байх тухай мессэж өгөх гэсэн байх. Гэвч тэгээд үзэгч бүр өөр өөрийнхөөрөө дүгнэх биз ээ.
Comments