Хуулийн мэргэжил, хуульч, өмгөөлөгчдийн тухай өгүүлэх кино бүтээлүүд түүхэнд олноор тэмдэглэгдэн үлдсэн. Тэдгээрт гарах үйл явдал хэдий хошин өнгө төрхтэй эсвэл онц сонирхолтой гэх мэт янз бүр байх ч нэгэнт ХАМГИЙН САЙН НЬ гэж хэлэгдэхүйц үнэлгээг олон хүнээс авсан байдаг. Тэгэхээр миний бодлоор шилдэг катогерт орох, мөн хуулийн сургуулийн оюутнууд чөлөөт цагаараа үзэхэд тохиромжтой хэдэн киног доор жагсааж бичлээ.
To Kill a Mockingbird – Тус кино нь 1962 онд Америкийн зохиолч Харпер Лийгийн хамгийн алдартай бүтээл “To Kill a Mockinbird” зохиолоос сэдэвлэгдэж, бүтээгдсэн. Энд гарах арьс өнгөөр ялгаварлах үзэл болоод хууль, эрх зүйн ярвигтай тогтолцооны сул тал, ээдрээтэй нөхцөл байдал нь өнөөдөр зарим улс орон, АНУ-д ч хурцаар тавигдаж, маргаан дагуулсаар байгаа билээ.
The Paper Chase – Мөн л адилхан нэртэй зохиолоос сэдэвлэгдсэн, 1973 оны бүтээл. Үйл явдал нь Харвардын хуулийн сургуулийн 1-р курсын оюутан Жэймс Харт болон Гэрээний эрх зүйн багш, профессор Чарлес Кингсфилд, түүний охин Сюзанфилд 3-ын хоорондын харилцааны тухай. Ер нь 1-р курсэд орохоосоо өмнө үзсэн байвал зүгээр.
12 Angry Men – Хэргийг шийдвэрлэх шүүх бүрэлдэхүүний ач холбогдол, үндэслэл бүхий эргэлзээг өгүүлэх кино гэж байдаг бол чухам үүнийг л нэрлэх байх. 1957 онд гарсан, АНУ-ын классик жүжигчин Хенри Фондагийн бүтээсэн дүр “8-р төлөөлөгч” нь үлдсэн 11 хүний цуг хүн амины хэргээр шүүгдэгчийн гэм буруутай эсэхийг хэлэлцэх үүргийг хүлээдэг. Та түүний хэрхэн бусадтай зөвшилцөж, процессын эргэлзээтэй асуудлуудыг эгзэгтэй нөхцөл байдалд тайлж байгааг хараад гайхахгүй байхын аргагүй болох болно.
My Cousin Vinny – Шүүхийн, бас инээдмийн жанрын кино. Нью Йоркоос Алабамаруу чиглэх урт аялалд гарсан 2 найз энэ үеэр хүн амины хэрэгт сэжигтнээр татагддаг. Сэжигтэн Биллигийн үеэл ах Винни гэх туршлага муутай, шинэхэн хуульч тэднийг өмгөөлөхөөр болно. Киноны шүүхийн танхимд үргэлжлэх хэсгүүд нямбай хийгдсэн гэсэн үнэлгээг кино шүүмжлэгчдээс авсан байдаг байна.
A Few Good Men – Хүмүүс тус киног жүжигчин Жэйк Николсон, Том Круйзруу “Чи үнэнтэй эвлэрч чадахгүй!” буюу “You can’t handle the truth!” хэмээн шүүхийн танхимд орилох хэсгээр нь мэдэх байх. Гэвч энэ бол эх киноны багахан хэсэг нь юм. Үйл явдал нь бусдын амийг хөнөөсөн хэргээр буруутгагдсан АНУ-ын тэнгисийн цэргийн 2 албан хаагчийн цэргийн шүүхэд өрнөх маргаан болон тэднийг өмгөөлөх өмгөөлөгчдийн талаар. Хэргийн материалыг цуглуулах бүрт хүнд хэцүү байдал тэдний өмгөөлөгчдийн өмнө тулгарах болно. 1992 оны тус бүтээлийг жүжигчдийн гайхалтай ур чадвар, харилцан яриа, сонирхолтой үйл явдлууд чимсэн байна.
Erin Brockovich – Бодит үйл явдлаас сэдэвлэгдсэн бүтээл ба 2000 онд Оскарын шагнал хүртэж байжээ. Эрин Брокович бол Америкийн байгаль хамгаалагчдын төлөөлөл бөгөөд 1993 онд Pacific Gas and Electric Co (PG&E) хэмээх байгалийн хий, цахилгаан түгээгч компанийн эсрэг зарга үүсгэж, орон нутгийн иргэдийн эрхийг хамгаалахад чухал үүрэг гүйцэтгэсэн эмэгтэй юм. АНУ-ын баруун эрэгт орших Hinkley тосгоны иргэд үл мэдэгдэх байдлаар өвчинд нэрвэгдэж эхлэх ба шалтгаан нь тус бүс нутгийн гүний усыг PG&E компани бохирдуулж байжээ гэсэн баримтыг Эрин гаргаж ирдэг.
The People VS. Larry Flynt – Кинонд “Hustler” хэмээх насанд хүрэгчдийн сэтгүүлд ажилладаг редакторын тухай өгүүлнэ. Товчхондоо, АНУ-ын Үндсэн хуулийн 1-р нэмэлт өөрчлөлт болоод тухайн үеийн порнографи хэвлэлийн эрх чөлөө хоорондын зөрчил, маргааны тухай үйл явдал гардаг. Энэхүү хэрэг нь түүхэнд “Хастлер сэтгүүлийн эсрэг Фолвелийн хэрэг” хэмээн тэмдэглэгдэн үлдсэн байдаг ажээ.
Эдгээр нь энэ төрлийн бусад олон гайхалтай кино бүтээлүүдийн зөвхөн нэг хэсэг юм. Та амралтын өдрүүдээр эсвэл хичээлээ түр завсарлаж, амрах зуураа үзэж сонирхоорой.
Эх сурвалж: Lee Burgess, About.com
Зургийг dbreen, Pixabay
Comments