Тэр дундаа хүн амьны хэргээс хэрхэн мултрах вэ буюу How to get away with murder нэртэй АНУ-ын телевизийн олон ангит киноны эхний ангийг үзэв. Сонирхолтой л бүтээл байна. Хуулийн сургуулийн нөхдүүд үзвэл тэдэнд илүү ойрхон тусах байх. Ямартай ч өөрийн сэтгэгдлийг энд буулгая.
Кинонд Филадельфия мужийн Middleton хуулийн сургуулийн оюутнууд болон багш, профессор Анналис Кийтин, түүний өмгөөллийн багт тохиох элдэв нууцлаг, сонирхолтой үйл явдлын тухай өгүүлнэ.
Эхний улирлын, 1-р хэсгийн үйл явдалруу шууд ороё.
Галын наадам болж байна. Нэг нөхөр хэлэхдээ, өнгөрсөн 1 жил бидний хувьд хүнд хэцүү өнгөрлөө, энэ байдлыг манай сургуулийн хөл бөмбөгийн дайчид удахгүй өөрчилж, Охайогийн нуснуудыг байранд нь аваачина гээд л орилно. Бодвол сургуулиудын дунд удахгүй зохиогдох тэмцээнд бэлтгэж байгаа юм байх. Гэнэт сүр сар хийгээд л, хэдэн нөхдүүд ой модон дунд гүйлдэнэ. Учрыг тодруулбал, тэд хүн алчихсан бололтой. Тэрхүү хүн амьны хэргээс яаж мултарч болох талаар хоорондоо маргалдана. Ингэж байтал тэр үйл явдлаас 3 сарын өмнөх дүр зураг гарч ирнэ. Манай гол дүр, шинэхэн оюутан Вэс Гиббинс лекцийн их танхимд орж ирлээ. Төсөөлөлдөө, хичээлийн шинэ жил, эхний өдөр, эхний лекц гээд. Танхимд байгаа нөхдүүдийг давхар дурдах нь илүүц биз, бидний ярьдгаар аавын цээжүүд гэдэг шиг, өөртөө итгэлтэй, бардам нөхөд тэнд олон харагдана.
Гэтэл гэнэт л “Өглөөний мэнд, би та нарыг амьдралдаа өнөөдрийг хүртэл ямар аймшигтай зүйлс хийж байсныг мэдэхгүй ч товчхондоо хийсэн хэргийн чинь үйлийн үр өнөөдрөөс миний хичээлд суухад хүргэсэн байна” хэмээн Эрүүгийн эрх зүй, өөрийнх нь хэлдгээр “Хүн амьны хэргээс хэрхэн мултрах вэ?” хичээлийн багш, профессор Анналис Кийтин орж ирнэ. Түүний заах арга барил нь онолдох, түүнийг цээжлүүлэх биш, харин бодит практик дээр тулгуурладаг ажээ. Ингээд л үйл явдал жинхнээсээ эхэлнэ дээ.
Тэд лекцийн танхимд шүүхээр эцэслэн шийдвэрлэгдсэн гэх нэгэн хэргийн товч үйл явдлын тухай ярилцана. Үнэндээ одоо ч үргэлжилж буй бодитой хэрэг байж л дээ.
Артур Кауфман бол сурталчилгааны компанид CEO албан тушаалтай, хэргийн хохирогч нь юм. Доороо 2 нарийн бичигтэй. Жина Садовски бол түүний 2-р нарийн бичиг, бас нууц амраг нь. Хатагтай Кауфман буюу Артурын эхнэр тэр 2-ын энэхүү харилцааг олж мэдсэний дараагаар мань хүн Жинаг компанийн өөр хэлтэсрүү шилжүүлсэн. Гэтэл яллах талаас Жинаг Кауфманы даралтын эмийг аспиринаар сольж, өшөөгөө авахыг оролдсон хэмээн батлахыг оролддог. Кауфман ч аспиринаас харшил авч, anaphylatic шоконд оржээ.
Өмгөөлөгч үйлчлүүлэгчээсээ асуудаг нэг байнгын асуулт бол Та үүнийг үнэхээр хийсэн үү?
Бид нар мэдэхгүй. Жина үнэхээр Кауфманыг хордуулах гэж оролдсон уу, эсвэл хатагтай Кауфман Жинаг хорлох гэж оролдов уу, эсвэл бүр тэр 2 нийлээд Кауфманаас өшөө авах гэж оролдов уу. Оюутнууд энэ талаар олон санаа дэвшүүлдэг. Манай гол дүр Вэс бүр Жинаг Стокхолмын синдромд өртсөн хэмээн үздэг. Анналис Кийтин, Вэс Гиббинс, Конор Волш, Макила Прэйт, Ашер Милстоун гээд хэдэн гол дүрээс та хэрэгт ач холбогдолтой нотлох баримт цуглуулахын тулд юу ч хийхээс буцахгүй, айхтар зоригтой, санаачилгатай улсуудыг олж харах болно. Надад тэдний хувьд секс бол тоглоом байтугай юм байна дөө гэсэн бодол төрсөн. Дэлгэрэнгүй үйл явдлыг эх киноноос нь үзвэл зохистой учир нэг бүрчлэн энд буулгахыг хүсэхгүй байна. Ямартай ч уншигчдын үзэх эрмэлзлэлийг төрүүлж л байвал болно гэсэн зорилгоор энэ нийтлэлийг бичиж байгаа билээ.
Киноны 1-р хэсгийг үзэж дуусгаад, түүнээс нэг тийм хоосон гэх юмуу эргэлзээтэй асуудал үлдсэн нь профессор Анналис болоод нөхөр 2-ын харилцаа, Анналис мөрдөгч Нэйтийг үнэхээр зүгээр ашигласан уу, Лила Стэнгард гэх эмэгтэйг хэн, яагаад алсан бэ, бас манай 5 шилдэг оюутан яагаад Анналисын нөхрийг алчихсан бэ байв.
Эцэст нь таниас асуухад Actus reus болоод Mens rea гэж юу вэ? Энэ мэт хөөрхөн латин нэр томьёог киноны үйл явдал дунд хавчуулж, түүнийг тайлбарласан байсан шүү. За тэгээд мэдээж уран бүтээл учир нөхдүүдийн хэлж буй үгс бүр их хүчтэй, утга учиртай урсаж байсан. Өдгөө нийт 2 улирал, 30 хэсэг гарсан юм байна. Цаашид ч үргэлжлээд гарах төлөвтэй. Мөн кино шүүмжлэгчдийн зүгээс эерэг үнэлгээ авсан харагдана. Ямартай ч эхний улирлыг нь үзэж дуусгах төлөвлөгөөтэй байна даа, их сонирхолтой санагдсан шүү.
Comments