2016 оны 05 сард Английн Лютон хотод нэгэн хэрэг гарсан нь Вэйн Коммон гэх эр орон нутгийн шүүхийн байрнаас дээврийн материалыг нь хэд хэдэн удаагийн үйлдлээр хулгайлан авч, зарж байсан явдал юм. Шүүхээс түүнийг 17,000 паундын хохирол учруулсан болохыг тогтоож, 9 сараар хорих шийдвэр гаргажээ. Магадгүй тэрээр зүгээр л шүүхийн барилгыг дээрээс нь судалж, түүнтэй өрсөлдөхүйц загвар бүхий барилга босгохыг хүссэн байх.
Ямартай ч нэг маргашгүй зүйл юу вэ гэвэл, шүүхийн барилгын хийц, дизайн нь дэгжин хээнцэр байдлаар хүмүүс бидэнд эртнээс танигдаж ирсэн байдаг. Архитектурын сонгодог шийдэл, сүр жавхлант байдлыг илтгэсэн эдгээр барилгуудыг хараад хэзээд сэтгэл хөдөлмөөр.
Үзэмж төгс хийц бүхий шүүхийн барилгуудыг жагсаасан дараах мэдээлэлд та анхаарлаа хандуулна уу. Магадгүй Вэйн Коммоны толгойд эдгээр зүйлс багтаж байсан байх.
НЭГДСЭН УЛСЫН ДЭЭД ШҮҮХ
Нэгдсэн улсын Дээд шүүхийн байр уран барилгачин Cass Gilbert эрхэмийн дизайнаар 1935 онд баригдаж дуусах хүртэл хугацаанд тус шүүх тогтсон нэг газаргүй, нүүдлийн шинж байдалтай, АНУ-ын олон хот, газар байрлаж байв. Барилгын дизайн нь конгресийн танхим байрлах Капитол буйлдингтэй ижил төрлийн буюу эртний Ромын Коринт хэв загвараар баригдаж, гадна болон дотор талыг нь Вермонт, Жеоржиа мужуудаас бэлтгэсэн гантиг чулуугаар чимэглэсэн байдаг байна.
ЭЗЭН ХААНЫ ШҮҮХ
1870 оны үед хатан хаан Викториагийн хэв загвараар баригдсан, Английн Лондон хотод байрлах энэхүү сүрдэм том барилга бол Эзэн хааны шүүх юм. Эзэн хааны шүүхийн байранд Англи, Уэльсийн давж заалдах болон дээд шатны шүүхүүд байрлана. Гадна талын чимэглэлүүд нь тухайн цаг үеийнхээ шашин, соёлын онцлогийг өөртөө шингээсэн байх ба барилгын дээд талд Английн алдартай хуульч, шүүгч нарын толгойн хэсгийг сийлсэн байдаг. Үүнээс гадна, заргалдагч талуудыг илэрхийлэх нохой, муурны чулуун сийлбэр харагдана. Тус шүүх 88 шүүх хурлын танхим, 1000 гаран өрөө тасалгаа, 5.6 км урт коридороос бүрдэх учраас анх удаа зочилж буй улсууд эхний хэдэн удаа төөрөлдөх нь хэвийн үзэгдэл юм.
МУМБАЙ ХОТЫН ДЭЭД ШҮҮХ
Энэтхэг улсын Мумбайд байрлах Дээд шүүхийн барилга анх 17-р зууны дунд үед баригдсан. Хүмүүс тус шүүхээр чөлөөтэй орж гарч, хуульчдын ажлыг харж болохоос гадна барилгын гадна талын элдэв хачирхалтай сийлбэрүүдийг үзэж болох нь. Тэдэн дунд шударга ёсны жинлүүрээр наадаж буй сармагчингийн дүрс хүртэл байдаг гэнэ.
CHIESA DI SAN FIRENZE
Италийн Флоренцийн шүүх тус хотын зүрхэнд байрлах Chiesa di San Firenze гэх эртний, гоёмсог, хос сүмийн байранд байдаг байна.
СИНГАПУРЫН ДЭЭД ШҮҮХ
Энэхүү барилгыг дурсахгүй өнгөрч болохгүй байх. Сингапурын Колонийн дүүрэгт байх тэнгэр баганадсан дээрх барилга бол тус улсын дээд шүүхийн байр ажээ. Дээд шүүх нь өмнөх үеийн бөмбөгөр ногоон дээвэр бүхий баруун талын байрыг 1939 – 2005 оныг хүртэл ашиглаад, Английн уран барилгачин Norman Foster эрхэмийн гаргасан дизайны шийдлээр боссон, дээд хэсэг нь нисдэг таваг шиг хэлбэр бүхий шинэ байранд 2005 онд нүүж орсон байна.
Ирээдүйн тухайд, уран барилгач Zaha Hadid гэх эрхэм Мадридын иргэний хэргийн шүүхийн шинэ барилгын дизайныг 2008 онд гаргахдаа, барилгын бүтцийг газраас хөндий байлгахын тулд “зөөлөн, давшингуй, тектоник” хэлбэрийн загварыг зохион бүтээсэн байна. Гадна фасадыг төмөр панелаар шийдэж өгсөн нь тус барилгыг нугаларсан пүрш мэт харагдуулна. Харамсалтай нь тухайн үед тус барилгыг барих хөрөнгийн асуудал шийдэгдээгүйн улмаас өнөөдрийг хүртэл бодитоор биелэлээ олоогүй л байна. Магадгүй хэзээ нэгэн өдөр Хадидын загвар дэлхийн хаа нэгтээ босох байх.
Эх сурвалж: Legal Cheek
Comments