Энэ бол Америкийн Нэгдсэн Улсын Стэнфордын Их Сургуульд 1892 онд болсон бодит түүх билээ…
Арван найман настай нэгэн хүү сургалтын төлбөрөө олохоор хичээж байсан үе байлаа. Тэрээр өнчин байсан тул хаанаас мөнгө авахаа мэдэж ядан байтал түүнд нэгэн гайхалтай санаа орж ирсэн нь найзтайгаа хамтраад Стэнфордын Их Сургуулийн хотхонд тоглолт хийх явдал байв. Ингээд тэд Польш улсын агуу төгөлдөр хуурч Игнэйси Жан Падеревскид (1860.11.06-1941.06.29) урилга илгээсэн байна. Падеревскийн менежер тоглолтыг зохион байгуулахад 2,000 доллар шаардлагатай талаар хэлсэнд тэд тохиролцож, хөвгүүд ч тоглолтыг амжилттай зохион байгуулахын тулд байдаг чадлаараа хичээж ажиллав. Удалгүй тоглолтын өдөр ч боллоо. Падеревски ч товлосон ёсоор Стэнфордын Их Сургуулийн хотхонд өөрийн тоглолтоо толилуулав. Гэвч харамсалтай нь хөвгүүд тоглолтын тасалбарыг хангалттай борлуулж чадаагүйн улмаас ердөө 1,600 доллар л цугласан байв. Сэтгэлээр унасан хөвгүүд Падеревскид болсон явдлаа учирлаж, цугларсан 1,600 долларыг 400 долларын чекийн хамт өгч, үлдэгдэл 400 долларыг аль болох богино хугацаанд буцааж өгөхөө амласан байна. Гэтэл Падеревски “Үгүй ээ, үүнийг би хүлээн зөвшөөрөхгүй” гээд 400 долларын чекийг урж, 1,600 долларыг хөвгүүдэд буцааж өгснөө “Энэ 1,600 долларыг ав, та нар өөрсдөөсөө гарсан зардлаа үүнээс суутгаад ав, сургалтын төлбөртөө хэрэгтэй байгаагаа ч мөн ав, харин надад үлдсэнийг л буцаан өгөхөд болно” гэжээ. Хөвгүүд ихэд гайхан, түүнд маш ихээр баярлаж байгаагаа илэрхийлсэн байна. Энэ бол сайхан сэтгэлийн нэг л хэлбэр бөгөөд энэ үйлдлээс Падеревскийг ямар агуу хүн байсныг харж болох юм.
Тэрээр хөвгүүдэд чухам яагаад туслах ёстойгоо огт мэддэггүй байв. Харин бид бүгд л амьдралд яг үүн шиг асуудалтай тулгардаг. Гэвч бидний ихэнх нь зөвхөн “Хэрэв би тусалбал надад ямар ашигтай вэ” гэдэг талаар л боддог. Харин жинхэнэ агуу хүмүүс “Хэрэв би туслахгүй бол тэдэнд юу тохиолдох бол” гэдэг талаар боддог. Тэд хариуд нь ямар нэгэн зүйл хүсч үүнийг хийдэггүй. Тэд ингэх нь зөв хэмээн үздэг учраас л сайхан сэтгэлээр тусалдаг учраас тэр юм.
Игнэйси Жан Падеревски нь сүүлд Польш улсын Ерөнхий сайд болсон билээ. Тэрээр агуу удирдагч байсан боловч харамсалтай нь дэлхийн II дайны үеэр Польш улс эзлэгдсэн юм. 1,5 саяас хол давсан Польш хүн мөнгөгүйн улмаас өлсгөлөнд нэрвэгдсэн байдаг. Тухайн үед Падеревски хаашаа хандахаа мэдэхгүй байжээ. Ингээд тэрээр Америкийн Нэгдсэн Улсын Хүнс, нийгмийн халамжийн газраас тусламж хүссэн байна. Тухайн үед тус газрын даргаар хожим нь Америкийн Нэгдсэн Улсын Ерөнхийлөгчийн албан тушаалыг хашсан Хэрбэрт Ховэр ажиллаж байв. Ховэр өлсгөлөнд нэрвэгдсэн Польшийн ард түмэнд тусламж үзүүлэхээр болж, их хэмжээний хоол хүнс, үр тариаг даруй илгээснээр гай зовлонгоос аврагдсан байдаг. Харин энэ үед Падеревски Ховэртэй уулзаж, хувийн зүгээсээ баярласнаа илэрхийлэхээр шийдээд түүн дээр очтол Ховэр, Падеревскийн сайхан сэтгэлд талархаад барахгүйгээр үл барам, түүнийг маш хурдан угтан авч “Ноён Ерөнхий сайд аа, та надад баярлах хэрэггүй ээ. Та санахгүй байгаа байх л даа, гэвч та хэдэн жилийн өмнө хоёр хүүд коллежид ороход нь тусалж байсан даа, би тэр хоёр хүүгийн нэг нь байна” хэмээн хэлсэн байна.
Эх сурвалж: immstories.wordpress.com
Мэдээллийг бэлтгэсэн: Дөлгөөн
Comments