С.Эрдэнэболд аутортой, “Veritas, Хуулийн сургуульд суралцсан тэмдэглэл” нэртэй ном тэртээ 2008 онд анх хэвлэгдэж байжээ. Энэ үед мань хүн LLM буюу Master of Law гэх хууль зүйн зэргийг АНУ-ын Индианагийн хуулийн сургуулиас амжилттай хүртээд, Монголдоо эргэж ирсэн үе юмсанж.
Тухайн үед (магадгүй хэвлэгдсэнээс хойш 1-2 жилийн дараа) би хуучин блогоор нь ороод, тэнд нийтлэгдсэн тус номных нь 2-3 хэсгийг уншиж байлаа. Bar exam гэж юу вэ, LSAT гэж юу вэ, шүүхээр шийдвэрлэгдсэн хэргийн кодыг хэрхэн тайлж унших вэ гэх мэт сэдвүүд байв.
Ерөнхийдөө би түүнийг анх блогоор нь мэддэг болсон юм. Хэрэв та санаж байгаа бол тэрээр UBS телевизийн “Улс төрд шинэ манлайлагч” нэвтрүүлгийг хөтөлж, “Эзэнт гүрний туульс” номоо хэвлүүлж байсан. Одоо Монгол улсын Ерөнхийлөгчийн тамгын газарт зөвлөхөөр ажиллаж байгаа гэж ойлголоо.
Тэгвэл С.Эрдэнэболд блогоо шинэчлээд, тэнд өөрийн зарим бүтээлүүдээ хэн бүхнийг чөлөөтэй уншиж болохоор байрлуулсан байна. “Хуулийн сургуульд суралцсан тэмдэглэл” ном нь чөлөөтэй болсон байна. Тэрхүү ном нь их товчхон бөгөөд ойлгомжтой, сонирхолтой хэлбэрээр бичигдсэн байна. Миний хувьд Харри Поттер кинон дээр гардаг үл үзэгдэх нөмрөг нөмөрчихөөд Индианагийн хуулийн сургууль, номын сан, багш нарынх нь өрөөгөөр ороод гарсан мэт санагдав.
Хэрэв та хуулийн оюутан бөгөөд ирээдүйд АНУ-д суралцахаар төлөвлөж буй бол тус номыг заавал уншаарай гэж зөвлөх байна. Ер нь яг хуульч аутортой, тэгээд мэргэжлээрээ суралцаж ирээд, туршлага мэдээллээсээ хуваалцсан мэдээлэлтэй ном, блог манайд их ховор шүү.
Эцэст нь түүнтэй холбоотой зарим мэдээллийн холбоосыг доор үлдээж байна.
С.Эрдэнэболдын блог – http://erdenebold.mn/
С.Эрдэнэболдын танд санал болгох 12 ном – http://www.ikon.mn/n/dq7
Comments